Mi tanpui turin Samari mi nih kher a ngai lo a, mi tanpui turin lian lua an awm lo a, te lua an awm lo bawk. Zau taka inhawng an awm a, a ruka mi tanpui thin an awm a, thil neiha mi tanpui an awm a, sum leh paia mi tanpui ngai an awm bawk. Mizoram sawrkarin partial lockdown a puan hnu lawkah India sawrkarin ram pumah Lockdown a puang ve leh nghal a, Mizoramah phei chuan curfew-in a chhunzawm zui a, a buaia te chu buai tak an ni tih hi mi tam tak hre lo mah se, mi luangchhuak te atang hian ngaihdan a siam theih.

Mizo Facebook group lar tak pakhatah Lalbiakdika Ngente hian, 'Pathian ropui ber rawh se. Kan sawrkarin kan him tlan zawk nan kar khat chhung Partial Lockdown nei turin thu a chhuah leh ta a. Nitin eikhawp thawkchhuak thinte tan sum hmuhna a awm dawn rih lo ang. He kar khat chhunga ei leh bara harsatna tawk te tan puih theihna che ka lo neih ve takin a hnuaia number tarlanah inthlahrung hauh lovin min rawn be dawn nia.. Lalbiakdika Ngente (Bda) 9612148428,' tih a post.

Chawlhhmun pa Muantea, Malsawm House neitu leh LB Associate neitu BD-a te hian midang tanpuina hi sum leh pai zawngin an hlan lo a, an In luah te luah man thla khat atana ngaidam leh a mamawhte tan nitin mamawh an hnena lam chu a lo pe mai thin a ni. "A tirah chuan sem kual kha kan tum dan a ni a, mahse, hetianga curfew te puan zui a nih takah kha chuan kan sem thei ta lo. In lamah hian an rawn lam ve reng, a rawn tlulut te hi chu an mamawh tur chin kan lo pe mai thin," tiin BD-a hian ZALEN a hrilh.

Khawi veng atangin nge pantu in neih tih chungchangah Bungkawn pa hian, veng hrang hrang atanga pantu an neih thu a sawi a, Aizawl pawn atanga pawhin pantu a neih nual thu a sawi bawk. Nimin thleng khan pantu an la neih reng a, phone pawh an dawn ve reng thu a sawi lang tel bawk.

Malsawm House tih hminga sumdawnna kalpui Muantea hian a In luahte chu March thla chhung atan luah man a awl a, chumai bakah harsatna an nei a nih chuan ei tlang dial dial tur nia a ngaih thu ZALEN a hrilh. Muantea chuan, "Ka rilru berah chuan Mizo kan nih anga indawmkan tawn zel hi ka thinlung luahtu ber chu a ni. Kei pawh mi hausa ka ni lo a, belhchian tlak pawh ka ni lo, mahse, hei hi kan ram economic ngaihtuaha ka tih ve theih tawk a ni a, sem sem dam dam tih Mizo ten kan neih reng hi chhawm nung ila ka duh. Thla khat chhung kan In luah man ka awl avang hian kan retheih phah ka ring lo a, thla khat In luah man hi ka hausak phah pawh ka ring lo. Hetiang harsatna ramin a tawh laia ka tih theih ve tawk ka ti ni mai-ah ka ngai," tiin a sawi.

Whatsapp lamah pawh tanpuina pe thei te thu leh hla forward hmuh tur a awm fo bawk a, uangthuanga ngamtlak te fiam nana lo hmang te an awm thin erawh hi chu fuh lo tak a ni. Whatsapp lamah hian tanpui thei anga number tarlanna an rawn forward hmuh tur a awm nual laiin, mahni-a rawn inzuar tak erawh hi chu hmuh tur a awm meuh lo thung a, hemi number …. ah hian phone rawh tih a ni deuh zel a, a dik chin hriat a har khawp mai.

Hetihlai hian TV leh chanchinbu mai bakah facebook-ah leh whatsapp lamah pawh mi tana luangchhuak chanchin hmuh tur leh mi tana luangchhuak chanchin hmuh tur a awm. Kan Minister leh MLA te, Aizawl bikah chuan ward councillor te mi dang tan an luangchhuak nasa hle a, tin, veng tina Local task force hnenah mi tam takin sum an chhunglut a, heng te hi chhuanchham leh mi harsa zawk te tanpuina atan lut vek a ni a, chumi piah lamah khawtlang himna tura hmalakna tur te a ni bawk.

Sawi hmaih theih loh erawh ram dang atanga lirthei hmanga kan ei leh in tur rawn phurtu te hi an ni a, anni hian kan rama chhung tin te ang bawkin he natna hi an hlau lo bik lo ang. Chutih laiin anni hian ram tan an theihtawp an chhuah mek reng a, hri leng karah ngaihtuahna fim pawh hmang lem lova anchhia lo lawh bawrh bawrh te karah kan tan hian theihtawp an chhuah reng a, chhak leh thlang, chhim leh hmarah a chang chuan ei leh in tur pawh hmu mumal lovin kan nitin mamawh thiarin hna an thawk tih hi mipui hriat atan a pawi-mawh khawp mai.