March 29, 2023-a Lunglei Municipal Council inthlan turah political party hrang hrangte an tang hle a, tunlai hian party hruaitu hrang hrangte chuan beihpui thlakin Lunglei khawpui an chamchilh mek.

Lunglei Municipal Council inthlan lo awm turah hian Mizo National Front, Zoram People’s Movement leh Congress party te chuan bial awm zawng zawng, bial 11 an chuh kim vek a. Bharatiya Janata Party chuan seat kua an chuh bawk a, party dang emaw, independent emawa ding an awm lo a ni.

Lunglei Municipal Council-a seat 11 zinga pali hi hmeichhe tana hauh (reserve) a ni a, hmeichiate tana hauhte chu Ward No. 2, No. 5, No. 8 leh No. 10 te an ni.

State Election Commission-in ruahmanna a siam dan chuan March 29 zing dar 7 atanga tlai dar 4 inkarah vote thlak a ni ang a, vote tlate hi April 3, 2023 (Thawhtanni)-ah chhiar a ni ang.

Lunglei Municipal Council, 2023-ah hian Electronic Voting Machine (EVM) hman a ni dawn a, vote thlaktuten him leh awlsam, hun khawh ral lo leh rang zawka vote an thlak theih nan polling station 44-ah vote hi thlak tura ruahman a ni.

Lunglei Municipal Council (LMC) inthlanpui neih turah hian LMC tana electoral roll siam hman a ni dawn a, roll-ah hian vote nei mi 40,541 an awm a, heng zinga 19117 chu mipa an ni a, hmeichhia 21,424 chu hmeichhia an ni.

LMC inthlan turah hian party pathum - MNF, Congress leh ZPM te chu inbei ber tura ngaih an ni a, ni tin boruak inthlak thut thut zel a nih avangin tunge sawrkarna siam ang tih sawi mai a har hle niin Lungleia chanchinbumi pakhat chuan a sawi.

Hetih lai hian Lunglei Municipal Council din turah hian mi tam tak chu an la hmin lo hle a, municipal council hi a din chuan a hmaa hamthatna chi hrang hrang ni 100 inhlawhna leh thil dang an lo hmuh thinte kha tihtawp a ni dawn a. Chu mai bakah chhiah chi hrang hrangte chawi a nih tawh dawn avangin duh lo mi eng emaw zat an awm nia thudawn a ni.