Mizote nunah hnam dang thilsiam aia mahni ram chhung thil siam ngei ngaihhlutna chang hria an pung tual tual a, chu chuan thil siam thinte phurna thar a pe a. Mahni in leh pisaah te kan dehchhuah ngei hman kan uar thar avangin thilsiamtute tan pawh eizawnna kawng zau zawk a inhawng thar zel a, heng zinga a chhawrtu ber chu thiamhnang leh puantahtute hi an ni awm e. India ramah hian Mizoram, Tripura, Assam leh Nagaland te hi handicraft uar zual state an ni a, hlum atanga thil siam hi Uttar Pradesh-in an uar hle bawk. Mahni thilsiamte pho chhuaha mipui hnena inzawrh nan leh thil siam tihlar nan Fair leh exhibition a tangkai a ni tih hriaiin thil siamtute pawhin an uar ta hle mai. Tun hnaiah mai pawh Hnam Chhantu Pawl huaihawtin Assembly House Annex building-ah Exhibition Fair neih a ni a, tlawhtu an thahnemin dawr (stall) nghaktute pawhin an thilsiamte an hralh thei hle niin an sawi. Fair buatsaihtu Hnam Chhantu Pawl President R.Ramhmangaiha chuan hruihnang hmanga thilsiam chu eizawnna tlak nia a hriat thu a sawi a. “Kan thil siamte hi hnam dangin an duh hle a, a bikin mau atanga siamte hi an lei duh zual a ni,” a ti. R.Ramhmangaiha chuan handloom leh handicraft chu tun aiin sawrkarin ngaihsak thei se a duh tih sawiin, “Uar zawka sawrkarin a kalpui theih chuan mi tam zawk eizawnna a siamsak dawn bakah Mizoram sum lakluh pawh a pung thei dawn a ni,” a ti bawk. Fair hi Mizo mai bakah hnam dang eng emaw zatin tlawhin Mizo thilsiam chhuahte an lei a, stall 15 hawn a ni. Puan zuartu nu pakhat chuan fair/exhibition a inpho chuan an thil zawrhte chu ni dang ai chuan an hralh tha deuh zel niin a sawi a. Inhralh mai bakah midangte hriata inpho chhuahna hun remchang a nih bawk avangin an hlawkpui hle niin a sawi. Mumbai atanga lo kal hmeichhe pakhat chuan Mizo thil siam a ngaihsan avang leh kawlthat ve hrim hrima duh avangin an thil zawrh chu eng emaw zat a lei niin Zalen palai a hrilh bawk.