Mi thahnemngaiten Zo hnahthlak tam berin kan hman, Mizo/Lusei/Duhlian tawng tih hmasawn zelna atan nasa takin hma an la thin a. An hmalakna avangin Mizo tawng pawhin hmangtu a ngah sawt hle mai a, Zo hnahthlak te pawhin kan pawm tlan ber niin a lang ta. Mizo tawng hmasawn zelna atan Human Resource Development Board hmalakna in Mizo Language Board din tura hmalak a ni a, an hmalakna chuan a hmawr bawk hnaiin tun kar atanga Mizoram Legislative Assembly session loawm turah Mizo Language Board dinna tur bill ‘Mizo Language Development Board (Draft) Bill, 2022’ chu Assembly House ah putluh a ni dawn ta.

Chief Minister Zoramthanga chuan Mizo Language Board din hi a ngai pawimawh a. Board din kawnga hma lo la tur leh a tul ang ang te lo buaipui turin Human Resource Development Board chu ruat an ni a. Anni hian mi thiamte phungbawmah sawmin theihtawpin hma an la a. Session a putluh theih turin bill hi an peih ta a; mahse, Allocation of Bussiness Rules-ah eng/khawi department kutah nge awm ang tihah ngaihtuahna sen ngai a awm leh deuh avangin house ah putluh mai theih a ni lova. Ngun taka ngaihtuah hnuah School Education department hnuaiah dah a ni ta a ni.

Mizo Language Board dinna tura hma latu Human Resource Development Board vice chairman L.Thangmawia MLA chuan Mizo tawng chu Pathianin mal a sawm tih sawiin, “Mizo hnam hrang hrangte pumkhat zawnga min phuarkhawmtu ni thei se ka duh hle a ni,” a ti. Mizo Language Board hma-lakna tur pawimawh sawiin, “Science leh Mathematics bikah Mizo tawnga awm lo scientific term a tam em em mai a. Hengte hi Mizo tawnga seng luh emaw, a tlukpui emaw dah kawngah hma a la ang a. Hei mai bakah Mizo tawng tihhausak leh vawrh darh kawngah hma lain hna a thawk thin dawn a ni,” a ti.

Mizo Language Board kalphung tura hi ruahman dan chuan chairman-in a ho ang a, chairman hi kum 50-70 inkar, Master degree nei an ni tur a ni a. Chairman bakah ex officio pathum - Chairman, MPSC; Director, SCERT leh Art & Culture department, member-ah Mizo Academy of Letters, Mizo Writers Association, MZU aiawh mi pahnih theuh leh mi thiamte dah tum a ni.

Mizo Language Board dinna tur bill house ah putluh a ni tur chu Mizo Academy of Letters, Mizo Writers Association, Mizo Grammer Association leh ziak mi thahnem takin lawmawm an tih thu an sawi a. Bill chu a tirah chuan a la famkim tawk lo vang tih sawiin tihchangtluna siam rem zel tur a nih dawn avangin house a ngaihtuah hunah pawh pass-pui ngei turin MLA-te an ngen tih an sawi bawk.