FEATURE: Mizoram-in khapna hnuaiah Kumhlui thlah liamin Kumthar lawm; Hun tiam chhunga halmawi hal phalsak ngaihdan a lian

ZALEN, January 02, 2026: Halpuah leh halmawi khapna hnuaiah Mizoram chuan Kumhlui thlah liamin Kumthar a lawm a, khapna thupek erawhin zawm a hlawh lem lo. ZALEN in district hrang hrang a biakna atangin 'awmze neia hal a ngai tawh' tih ngaihdan a awm lian tih a lang thei a, a theihnaah chuan a hun leh hmun siam anih loh pawhin hal hun siam phal mai duhna a awm lian tih a lang thei a. Hetih lai hian district thenkhat-ah hal dan kalphung dang deuh zawk a piang tan niin a lang bawk a, mumal zawka hal dan neih hi a hun tawh em? 

'Kan hal thiam tawh hle ka lo ti tawh zawk a. A nihna takah chuan mipui tam zawkin thlir nuam kan ti a, hmunnawm kan ti a, hei vang hian khapna thupek pawh a hlawhtling hleithei lo a ni ber a. A haltu tan pawh nghakhlel taka lo thlirtu an awm tih hriata, hal nuam ti chi niha, sum neih tho chuan hal loh a nuam lo letling thei hial ang! A hal ngai hian an hal a, tam takin hmuhnawm ti takin kan thlir tlang a, chu chu darkar chanve-ah kan khung tlangpuia, kan duh tawk ni pawhin a hriat a ni,' tiin AMC Corporator, Rosiamngheta chuan ZALEN a hrilh.

'A thatna lam aiin a thalohna lam kan sawi uar a. Van lam a han de chuai a, naupang hlim khek ri te, a thlirtu lam tan chhungkuaa hun hlimawm tak siamtu lo ni bawk nen, hengte hi a man chhiar chi pawh va ni suh,' tiin Aizawl LC member pakhat chuan a sawi bawk a.

Mumal zawka hal dan neih hi a hun tawh tih hi mi tam tak rilrua cham mek a niin a, "Kan hal duh zawng pawh a changkang zel a, hal dan pawh kan thiam sawt a, hun bi neia hal hi inzirtir ila, hun tiam pawn lamah hal phal lo ila, inzirtir theih kan nih ka ring a. Mizote hi civic sense nei tha thawkhat thuawih thei chi kan ni a, heti zawng hian kalpui ni se kan tih theih ka ring," tiin Aizawl veng pakhat khawtlang hruaitu chuan ZALEN a hrilh. 

-District Magistrate in hal khap thu hi district tinah a tichhuak vek a. District capital 11 feedback lakkhawm hi lo chhiar ve la, engnge i ngaihdan le?

AIZAWL: CYMA in a zia hret an ti

CYMA lam chuan ni 31.12.2025 kum hlui thlah leh kum thar (2026) lawmna hunah kum dang aiin Aizawl ah halpuah leh halmawi hal a ziaawm niin an sawi a.

ZALEN in Central YMA Finance Secretary M.S.Ralte a biaknaah kum dang aiin kumin kum thar lawmna vuakvetah Aizawla halpuah leh halmawi hal a ziaawm nia a hriat thu a sawi a. "Sawrkar, kohhran leh tlawmngai pawlte'n theih tawp kan chhuah tlang a, kan ngenna mipuiin min zahsak niin kan hria a. Hetih lai hianin hal lui erawh mi eng emaw zat an la awm a. Kan ziaawm chho hret hretin kan hria a, a lawmawm kan ti takzet a ni," a ti. 

ZALEN in Aizawl khawpui veng hrang hrang YMA hruaitute a biak kualnaah pawh hal chu mi eng emaw zat awm mah se, kum dang ai chuan a ziaawm nia an hriat thu an sawi hlawm a. Hetih lai hian veng thenkhat khawtlang hruaitute chuan sum van vangin kumin chu tlemin a zia deuh nia an ngaih thu an sawi ve bawk.

LUNGLEI: Hal ve pangngai

A hma atangin police lamin press conference leh activities dang neiin tan an la nasa a, YMA lam atangin ngenna te pawh tihchhuah a ni a. Kum hmasa nen a danglam tehchiam lo nia thudawn a ni a. H. Lalthansanga, Lunglei MJA President chuan, "Khap hneh tak tak theih a ni lo a, tih dan ngai hian awmzia a nei lo tih a lang tawh a, hal hunbi siam a, a theih phei chuan a hmun siam mai hi a hun tawhin ka hria a. Aizawl angah chuan a hmun a harsa mai thei a, district lamah chuan thil tih theih niin ka hria," a ti bawk.

HNAHTHIAL: Puak lo tawp chu ni lo

Kan thudawnna sawi danin kum dang ang bawkin halmawi lam an uar a, hal hun chhung erawh a rei lo deuh a, kum hmasa lam ai chuan hal pawh an tlem deuh. Police lam prison van nen an tlankual nia thudawn a ni bawk.

SAITUAL: Khaw pawnah inthiarfihlim 

C. Rammawizuala, Huiva Cable sawi danin "Khaw chhunga hal tawk an la awm a, nikum lam kha kan zia viauin ka hria a, kumin hi tlemin kan uar leh hret em aw ka ti a. Hetih lai hian Saihmartlang lamah tam tak chu hal turin an inthiarfihlim thung," tiin thudawnna chuan a sawi.

LAWNGTLAI: Mit ti tlai tawkin an hal

Lalngheta Ralte, Editor The Lawngtlai Post sawi danin Lawngtlai chuan 'thlirtute mit ti tlai tawkin an hal a.' Khawpui chhunga hal an awm laiin, khawpui chhung hmun fal leh rem lai deuh hmun hnih (2) ah hal tura in la hrang an awm nual a. "Official lem loin hal dan kalphung dang a chhuak tan deuhin a lang" tiin ZALEN a hrilh bawk a. Halmawi thlir chak an awm ve bawk avang hian a hal thinte hi tam takin an chang a, hei hian hal turin pressure a pe ve bawk niin Elvis Lalthangzuala, Rauthla chuan ZALEN a hrilh a ni.

SIAHA: Khawtlang hruaitu hmalakna hmun a hriat

Kum dang ang thoin hal mahse, veng thenkhat VC te an khauhna hmunah chuan a ziaawm nia thudawn a ni.

MAMIT: Kan zia an in ti

Kum hmasa aiin hal an tlem a, thin ti thawng chi hal an awm an hre mai lo a. Van lam chei chi an hal tam zawk a. "Khua a lian loa, han hal chiam tham kan awm lem lo a. Mamit chu a ngen a ngen kan nih chuan thuawih thei tak kan ni," tiin Lalramhnehzauvi, Mamit Times chuan a sawi.

CHAMPHAI: Hal hunchhung a rei lo

Accredited Journalist, Lalhlupuia sawi dan chuan Magistrate duty 2 siam a ni a, police leh YMA an duty bawk a. YMA lam pawhin mipui hnenah ngenna an chhuah a. "Kum hmasa ai chuan hal kan tlem zawk a, bakah hal hunchhung a rei lo zawk bawk a, police lam pawhin mi man an nei lo," tiin a sawi.

SERCHHIP: Khaw hlui tlangah hal tur an in la hrang 

Sub Headquarters YMA in Sawrkar thlawpin halpuah leh a kaihhawih hal lo turin ngenna siam a ni a. Khawpui chhungah hal lo tawp chu ni lo mah se thawm a awm vak lo a. Serchhip khaw hlui tlang chhipah hal tura kal an awm nual a, hal hun chhung a rei lo a, 11:55 ah intanin 12:15 ah chuan thawm a awm tawh lo nia thudawn a ni. Serchhip lam thudawnna Lalremruata Ralte, Ramlai Arsi sawi danin Serchhip khawchhung social media group awmze neia titi theihnaah pawh halna hmun leh hun siam mai chu an sawi tam ber a ni.

KOLASIB: Hal nain nikum aiin a ziaawm?

Senior journalist in a sawi danin YMA Duty post ah Excise leh Police lam an duty ve mai a, mobile patrolling tih reng a ni a. SDPO in duty a huaihawt bawk a. "Hal chu kan tam khawp a, kum hmasa aiin kan zia hret em aw? chu ka ti," tiin a sawi bawk. 

KHAWZAWL: Hal lo tawp chu kan ni lo

"Kum dangah pawh han hal chiam thei tur hi kan awm mang lo a, zawm thuah chuan khapna hi kan zawm lo, hal an awm tho a, police lamin an vil reng bawk," tiin thulakna chuan a sawi.