Tunhma deuh kha chuan IAS-ah hian Mizo eng emaw zat an inziak tling thin a; mahse, tun hnai kum eng emaw kalta atang khan Mizote zingah IAS inziak tling an awm ta lo a. Hei hian sawrkar mai bakah mipui rilru a tibuai a, IAS-ah Mizote an tlin leh thuai theih nan sawrkar, kohhran, tlawmngai pawl leh zirlai pawlten nasa takin tan an la mek.

Mizoram Youth Commission pawhin nasa taka tan lain tun hnaiah pawh Super IAS exam-te neiin zirlai 40-te chu full sponsorship ngaihtuahsakin IAS an tlin ngei theih nan hma an la a. Heng zirlai 40-te hi bond sign-tirin kum thum chhung tal chu exam turin thu an tiam a. Zirlai thlanchhuah mi 40-te hi remchang hmasa berah coaching centre tha, VISION IAS, ALS leh VAJI-RAM & RAVI-ah te coaching kal turin Delhi-ah thawn tum an ni a. MYC chairman leh MYC thawktuten heng coaching centre-te hi an enfiah leh mek a ni.

Mizote IAS kan tlin theih loh chungchangah hian ngaihdan chi hrang hrang a tam hle. 

Mizoram Chief Secretary hlui, Lalfakzuala, IAS (rtd) chuan Mizote IAS an tlin theih loh chhan ber chu state danga kalchhuah an hreh vang nia a hriat thu a sawi a. “Mizoram sawrkar hnathawk hlawh a sang a; chuvangin, state danga kal chhuah ai chuan lehkhathiam thei deuhte pawhin mahni state ngeia MCS, MPS etc.-a thawh mai an duh a. Hei mai bakah zirlaite zingah rualelna tak tak rilru pu hi an tlem niin ka hria,” a ti.

Lalfakzuala chuan tun hnaiah tribal quota-a IAS post chu tribal dangten an hnawh khah tak vang leh heng tribal dangte hi kan tluk tak loh vanga Mizote chu IAS-ah lang ta lo nia a hriat thu Zalen a hrilh bawk.

Central YMA Asst. Secretary Prof. Malsawmliana chuan tumna tak tak kan neih loh vanga IAS-ah hian Mizote hi lang lo kan nia a hriat thu a sawi a. “Insawrbinga tum tak tak hi kan tam lo niin ka hria a. Kum 2/1-a tum thut chi niin ka hre lo a, vannei leh thiam deuh chu an tling thut tho nain hun eng emaw chen atanga inbuatsaih ngai a ni a, kan inbuatsaih tha tawk lo niin ka hria," a ti. Prof. Sawma chuan kum tina state civil services lak thin chu tih danglam nise central service ah Mizo tam zawk an lan a rin thu a sawi bawk.

Mizo Zirlai Pawl President Lalnunmawia Pautu chuan All India Service leh Central Service tling turin kan inbuatsaih tlai thin nia a hriat thu leh kum tin MCS lak ziah a ni leh hamthatna an dawng tha chu IAS-a Mizote lan loh chhan nia a hriat thu a sawi. 

Mizo Students’ Union Asst. General Secretary Laldinsanga pawhin tih tak takna nena kan beih loh avang leh kan rilruin a cho tawk loh vang nia a hriat thu sawiin state service-ah kan lungawi thin pawh hian min pawthniam nia a ngaih thu a sawi bawk.