Mizoram MLA term kal meka MLA ni lai zingah sum vaibelchhe chin nei ‘crorepati’ 29 an awm a, hei hi MLA awm zat 40 atanga chhutin 73% a tling. Nimin Aijal Club-a Association for Democratic Reforms ten chanchinbumite tana Electoral & Political Reforms chungchang sawihona an neihpui ah he thu hi sawiin kum 2008 assembly inthlanpui a MLA te aiin tun term kal meka MLA te hausakna chu a sang zawk nia sawiin term kalta khan crorepati hi 13 an awm tih an sawi a bawk a ni. Kum 2008 assembly aia 2008 assembly a MLA hausakna chu chawhrualin nasa takin a pung tih sawiin kum 2008 assembly a MLA te hausakna chu chawhrualin nuai 57.85 anih laiin tun term kal meka MLA te hausakna chawhrual chu vaibelchhe 2.83 a ni a, hei hi state danga MLA te ngaihtuahin a sang hle niin an sawi. Tun MLA term kal meka party hrang hrang te hausakna chawhrual chu MLA 34 neitu Congress chu vaibelchhe 2 a ni a, MNF MLA 5-te hausakna chawhrual chu vaibelchhe 6 niin MPC MLA 1 hausakna chu vaibelchhe 3 a ni. MLA ni lai zingah Aizawl West I bialtu MLA K.Sangthuama (MNF) chu a hausa ber a, a thil neih zawng zawng hi Rs. 25,57,85,022 a ni a, a dawttu Serchhip bialtu MLA Lal Thanhawla (Congress) thil neih hlut zawng chu Rs. 9,15,45,980 niin pathumna chu Tawi bialtu MLA R.Lalzirliana a ni a, Mamit bialtu MLA John Rotluangliana leh Lawngtlai West bialtu C.Ngunlianchunga ten an dawt leh a ni. MLA ni lai zingah hian Aizawl South I bialtu MLA R.Vanlalvena chu a rethei ber a, a thil neih hi Rs. 29,03,257 nia tarlan a niin Hrangturzo bialtu MLA Vanlalawmpuii Chawngthu, Tuichang bialtu Lalrinliana Sailo, Tuivawl bialtu RL Pianmawia leh Lengteng bial MLA H.Rohluna ten an dawt a ni. MLA ni lai zingah hian Lunglei West bialtu Chalrosanga Ralte chu leiba ngah ber nia tarlan a niin a leiba hi vaibelchhe 2 (Rs. 2,60,00,000) nia tarlan a ni. Tun term kal meka MLA zingah hian pawl 8 atanga 12 inkar 9 an awm a, graduate leh a chung lam mi 31 an awm bawk.