Kum nga dana neih thin, Mizorama roreltu tur, Member of Legislative Assembly thlanna chu naktip hian neih a ni dawn a. Party hrang hrang chuh zingah rorel lai, Mizo National Front, eptu party Zoram People’s Movement leh Indian National Congress chuan bial zawng zawng bial 40 an chuh kim vek a. Party dang zingah BJP-in bial 23, AAP-in bial li leh independent-in bial 27 chuhin candidate zawng zawng hi an vaiin 174 an ni.

Mizoramin union territory a hmuh hnuah MLA inthlanpui neih hmasak ber, kum 1972, 1978, 1979 leh 1984 te khan Mizoram Assembly-ah bial 30 a la awm a. Mizoramin state a hmuh hnua inthlanpui neih atangin bial 40 awm tanin Mizoram state nih hnua inthlanpui neih hmasa berah independent (MNF)-in seat 24 lain sawrkarna an siam a, INC-in seat 13 leh PC-in seat thum an la a ni.

State nih hnua inthlan tum hnihna, 1989-ah INC-in seat 23 lain sawrkarna an siam ve thung a. MNF-in seat 14, PC-in seat khat leh independent-in seat hnih an la a ni.

Kum 1993 inthlanah INC-in seat 16, MNF-in seat 14 leh independent-in seat 10 lain Congress kaihhruai sawrkar a ding a. Kum 1998 inthlanah MNF-in seat 21, Mizoram People’s Conference-in seat 12, Congress-in seat ruk leh independent-in seat khat lain MNF kaihhruai sawrkar a ding leh a ni.

Kum 2003 inthlanpuiah MNF-in seat 21, INC seat 12, MPC seat thum, ZNP seat hnih, HPC seat khat leh Maraland Democratic Front-in seat khat lain MNF kaihhruai sawrkar a ding leh a. Kum 2008 inthlanpuiah INC-in seat 32, MNF seat thum, ZNP seat hnih, MPC seat hnih leh MDF-in seat khat lain Congress kaihhruai sawrkar a ding leh a ni.

Kum 2013 inthlanah INC-in seat 34, MNF-in seat nga leh MPC-in seat khat lain Congress sawrkar bawk a ding leh a. Kum 2018 inthlanah MNF-in seat 27, independent (ZPM)-in seat riat, INC-in seat li leh BJP ten seat khat lain MNF kaihhruai sawrkar a ding leh a ni.

Kum 2008 inthlanah khan bial 40 chuh turin candidate 206 an awm a, kum 2013-ah candidate 142, kum 2018-ah candidate 209 awmin kumin 2023-ah hian candidate 174 an awm a ni.

Kuminah hian candidate 174 awm mah se Lalpa Chhiahhlawh Intelkhawm candidate mi pali - Zaichhawna Hlawndo, Lalruatfeli Hlawndo, Lalramdingngheti leh Vanlalvena ten bial hnih an chuh kawp avangin candidate zawng zawng hi 170 an ni.

Inthlanpui vote tla hi 2013-ah 83.41% niin 2018-ah 81.11% a ni a, kuminah hian kum dang aiin vote hi a tlak that beisei a ni.