Mizoram State Rural Livelihood-in Mizoram hmun hrang hranga Self Help Group a din chu chhungkaw tam takin an hlawkpui hle nia thudawn a ni. Zalen zawhna chhangin MzSRLM thawktute chuan tun dinhmunah Kolasib, Serchhip, Mamit, Lawngtlai, Champhai leh Saiha District-a Block tinahte hma an la mek tih sawiin kum 2022 hmaa Mizoram chhung District zawng zawng tuam chhuak turin ruahmanna an siam mek tih an sawi a. SHG kaltlangin mi rethei chhungkaw tam takin hmasawnna nghet leh bulfuk zawk an nei thei tun dinhmunah Mizoramah SHG 3875 an awm mek a, khua/ vengtinah Village Organisation, SHG te kawi khawmtu 208 din a ni tawh tih an sawi bawk. SHG member-te chu skill hran hran ziritir an ni a. Bank savings, bank thawktute nena thawhhona tha neih leh loan lak chungchangah inzirtirte a tel a ni. Mahila Kisan Sashaktikaran Pariyojana (MKSP) hnuaiah Agriculture leh a kaihhnawih lama eizawnna kalpui leh kut themthiamna leh siamchhuah hmanga eizawnna kawngah te hma an lakpui tih sawiin kum 2017 atangin DDU-GKY hnuaiah thingtlang thalaite chu eizawnna tlaka an thiamna tah hriamsak leh hna hmuhsak tura hmalakna an kalpui niin an sawi bawk. 2017-18 chhunga National SHG Award dawng zingah Vau SHG, Bilkhawthlir South te chu thlan an ni tih an sawi a. Vau SHG hian tangkafai Rs. 100000/-, hriatpuina thuziak  leh lawmpuina Certificate chu Rural Development Minister-in June 11, 2018 khan Delhi-ah a hlan tih an sawi a. Hei bakah hian Mizoram chhunga SHG scheme hrang hrang zingah kum 2017 khan NABARD chuan SHG tha berah Alphonsa SHG chu a thlang a. Bilkhawthlir North VO chuan kum 2016 atang khan ICAR nena tangkawpin Kuhva hnah atanga disposable Plate siamna khawl dawngin, tunah hian an kalpui mek a, order pawh siam sen loh an hmu niin an sawi bawk. Tun hnaia national SHG award dawngtu Vau SHG hruaitu Nunmawii chuan SHG chu an hlawkpui hle niin Zalen a hrilh a. “Kan SHG hian kuhva huan te, dawmchhan te, buhtlei leh sahbawn te kan siam thin a. Heta tanga kan sum hmuh hi member ten puk chhawng ve lehin insakna tur sum nei lote pawhin in sak nante kan hmang a ni,” a ti a. Vau SHG-ah chuan member 6 an awm nia sawiin tuna an sum chevel chu nuai 2 a tling tawh niin a sawi bawk. Sawrkarin Self Help Group kal tlanga mi retheite chawi kanna tur programme a kalpuina National Rural Livelihoods Mission(NRLM) hi kum 2011 khan din a ni a, NRLM hnuaiah hian State tinah SHG te enkawltu tur dinin, Mizoramah pawh Mizoram State Rural Livelihoods Mission (MzSRLM) hi 2013 khan din a ni. MzSRLM hian kum 2015 atang khan SHG ten an tharchhuah leh siam chhuahte hralh chhuahna ‘SARAS Fair’ chu kum tin a siam thin a ni.