Tun hnaiah sawrkar hnathawkten old pension scheme hman leh an phut a, hemi chungchangah hian old pension leh new pension scheme chungchang chhui zau dawn ila.

Sawrkar laipui chuan a hnathawkte pension a pek dan chu hautak leh sum sen ngai a tam avangin mi thiamte zirchiantirin a hnathawkte pension-tir dan thar, new pension system chu January 1, 2004 atang khan a hmang tan a. Mizoram sawrkar pawhin a hnathawkte pension dan thar, new pension scheme hi September 1, 2010 hnu lama sawrkar hnathawk lut tharte tan a hmang ve tan a ni.

New pension scheme hnuaiah hian sawrkar hnathawkte chuan an hlawh (basic +DA) atanga chhuta 10% thla tin thawh (cut)-in chu chu sawrkarin 10% vekin a lo do let thin a. Hei bakah hian sawrkar hnathawk chuan a duh chuan voluntary contribution hmangin kum khatah Rs. 50,000 thleng a dah thei a, sawrkarin a do let ve lo thung.

Sawrkar hnathawk chu kum 60 a lo tlina a pension hunah a pension wealth-ah nuai nge emaw, a aia tam emaw a neih chuan a pension wealth atanga 60% hi a hlawmin vawi khatah pek chhuah a ni a, a la bang 40% chuan annuity leisakin annuity service provider-in thla tin pension a pe thin dawn a. Hetih lai hian pension a chhuah laia pension wealth nuai nga a neih tlin loh chuan pension wealth zawng zawng hi a hlawmin vawi khatah pek chhuah a ni a. Chhianchhiahna hnuhnung berah chuan Mizoramah NPS hmang mek mi 10,264 an awm a ni.

Hetih lai hian old pension scheme-ah chuan hnathawkten sum thawh (contribution) nei lovin an pension hunah pension sum hi sawrkar chuan a pe a. Pension latu (pensioner) a lo boralin a kawppui emaw, an fate emaw, kum 25 an tlin thleng emaw, an fanu chu kawppui (pasal) nei lo a nihin emaw, an fapa chu pianphunga rualbanlo a nih chuan pension hi an la chhunzawm thei a ni.

Old pension-ah hian pensioner chu kum 80 a tlinin a pension lak chu 20%-a tihpun tur a ni a, kum 85-ah 30%, kum 90-ah 40%, kum 90 hnuah 50 leh kum 100 a tlinin a pension lak chu 100% a tihpun tur a ni.

ZALEN zawhna chhangin finance lama mi thiam pakhat chuan old pension scheme hi Mizoram hian hmang leh ta se tun maiah chuan sum sen a tlem ang a; mahse, nakin zel atan erawh sum sen tur hi a tam hle dawn a. Short term atan old pension hi a tha a, long term atan erawh sum sen tur a tam dawn avangin new pension scheme hi a tha zawk niin a sawi.