Assam leh Mizoram ramri, Zophai hmuna MZP leh Assam Police te innawrnaa journalist kut tuarte chuan an thil tawnin nasa takin a la nghawng niin Zalen palai zawhna an chhang. Journalist-te kutthlak an ni hi mi tam tak leh pawl tam takin an dem thu an sawi a, thuchhuah pawh an siam a. Journalist-te hi an thil tawn hian chhe zawngin rilru leh taksaah a la nghawng tih Zalen palaiin a kawmna atang hian a lang a ni. The Aizawl Post a thawk Zohmingmawia chuan kan ram chhungah journalist-te zah kawngah a force lam te thlengin an tha hle niin a sawi a. An thil tawn hi chu an beisei loh lutuk thil a nih thu leh kum 10 chuang journalism field a hna a thawh tawhah a vawi khat tawnna a nih thu a sawi bawk. “Assam Police-te nen kan titi mawlh mawlh a, press mi kan ni tih hre rengin kut min thlak hi a mak ka ti a ni,” tiin Zohmingmawia chuan a sawi a ni. Kolasib journalist, DDK news stringer H. Vanlalnghaka chuan a thil tawn sawiin, “Assam Police-a Addl. SP te leh an Addl. DC te bulah ka awm reng a, an Addl. SP pawhin press card i ken chuan keng lang rawh min ti a, a hnu lawka kan buai thutah khan an Addl. SP hmu lai reng chuan ka khel leh hmun dangah min rawn hlap tho a ni,” tiin a sawi a. “Min tham lo lutuk, ui ang lekin min ngai,” tia sawiin zan 4 a mut theih loh thu leh BP sang nei ngai miah loin BP sang a neih phah niin a sawi. Kolasib atanga journalist kal, R.Lalnunmawia chuan jounalist anga kutthlak a vawi khat tawrhna a nih thu Zalen a hrilh a. Press mi a nih avangin thlamuang takin a kal thu leh beisei loh deuha journalist a ni tih hre rengtuten vawi leh khata an vaw ve chiam mai chu mak a tih thu a sawi a, MJA hmalakna leh an thlavang an hauhnaah a lawm thu a sawi bawk. AIR correspondent C.Lalthansangi chuan a thil tawn sawiin kut tuar thei dinhmuna awm an ni tih chu a inpawm niin a sawi a. “Nimahsela, press mi ka nih thu ka sawi hnuah hmeichhia ka nih pawh sawi lo a bawraw taka an che kha an demawm hle a ni,” tiin Zalen a hrilh a. A thlabar thu leh theihngilh har tak a nih dawn thu sawiin Zalen palaiin a kawm ni thleng pawh hian an vuakna na avanga a la inentir reng thu a sawi. Zonet atanga journalist kal, Joseph Lalnuntluanga March 8 a an kalin a tlanchhiat hman avangin kut a tuar lo niin a sawi a. Demna hrang hrang avanga a hnu ni ni 10 a an kal leh chuan kutthlak zawng an rawn chet a rin tawh loh thu a sawi a, “Beisei loh deuhin kut min thlak leh si a, ka chalah an vua a, ka banah vawi 2 leh ka mawngah vawi 3 min vaw bawk,” tiin a sawi a. “Tun thlengin ka thinrim a la reh thei lo a, TV vela invua lai te pawh hi ka en thei lo a, khami ni a ka video lak pawh ka en thei rih lo, editing pawh mi dang ka tihtir vek,” tiin a rilru lamah pawh nghawng a neih thu a sawi a, mumangah pawh a la mang phan zeuh zeuh reng thu Zalen a hrilh bawk. Kolasib atanga journalist kal tho Zomuanpuia chuan tharum tello a MZP in hma lak an tum laia hmanria nena hmanraw nei lo an zirlaite an lo bei chiam chu Assam Police te a dem thu leh mihring dikna chanvo palzutna a nih thu a sawi a. “Press card ka awrh a, camera ka keng bawk a, kut min thlak tho a, ka bike thlengin min vuak chhiatsak a ni,” tiin a sawi bawk. A hnungzang hmun 5 a an vuak thu leh a malpuiah te pawh an vuak thu sawiin a kiu hmun hnihah a pelh thu a sawi a. “Ka hnung ka delh hleithei rih lo a, ka ban ruh a la na a, ka lu chhip an vuakna hi a la na bawk,” tiin a na lai te Zalen a hrilh bawk. Tun thlengin BP sang a la neih thu leh doctor te chuan an thil tawnin a nghawng a nih an rin thu leh a reh leh mai an rin thua an chhan thu a sawi bawk a ni. Vanglaini reporter Malsawmdawngzela Hrahsel chuan a thil tawn sawiin, “Kan kal hmasak tumin kan thianpa an vua a, a ID a hmuh chung pawhin. Kan lung a dam thei lo a, buaina reh deuh hnuah an hotu Addl. DC leh Addl. SP lakah kan lungawi loh thu kan thlen a, ngaihdamte min lo dil a ni. An police-te khan journalist an hre lo ti dawn ila, Assam lam atanga journalist lokalte an him vek si,” tiin a sawi a. “Rilru lamah eng pawh thleng thei a ni tih hria a, kan lo inpuahchah lawk vang a ni maithei a, tun thlengin rilru lama a sawk na em em lo,” tiin Dawnga chuan a sawi a. An thawhpui hmeichhia dim hauh loa kut an thlak erawh chu a hrehawm a tih thu Zalen a hrilh bawk.