ZALEN May 24, 2026 : Tunlai hian online medicine chungchang a lar hle a. He thil hi tha ti pawl leh tha ti lo pawl an awm a, damdawi zuar pawl chuan tha lo an tih thu sawiin inkaihhruaina dan mumal awm loa online-a damdawi zawrh chu a him lo niin an sawi a. Hetih lai hian mi thenkhat chuan damdawi quality tha a nih tho avang leh a man a tlawm vangin tha an tih thu an sawi ve thung.

Online medicine hian kawh chi hnih a nei a, chung zingah chuan mahni kher va kal loa awm hmun atanga doctor thiam rawn a kawk a. Chi dang lehah chuan website emaw, app emaw hmanga damdawi chah a kawk bawk a. Heng chi hnih zingah hian online-a damdawi chah hi damdawi zuar leh mi thenkhatte sawisel chu a ni.

Online hmanga damdawi chah theihna hi chi hrang hrang a awm a, damdawi thenkhat chah dawn chuan doctor-ina chawhna (prescription) ngaite a awm bawk a. Damdawi thenkhatah chuan man tlawma lak theih (discount) awmin thenkhatah chuan member ni tan man tlawm zawka lei theihna a awm bawk.

Online hmanga damdawi chah hian thatna tam tak a nei a, a awlsamin hun a heh lo a, zanlai pawh nise a chah theih a. Heng damdawi chahte hi a tlangpuiin chah atanga ni sarih chhungin a thleng thin a, a man a tlawm bakah damdawi dawr pan kher ngai lova mahni kawtkaiah ngei an dah theih avangin mi tam tak tan a tangkai hle.

Online hmanga doctor thiam rawn chungchangah pawh doctor hmaa sawi ngam loh leh sawi zahthlak tam tak kha online hmang chuan sawi mai a hrehawm loh a. Hei bakah damdawi dawra damdawi lei hrehawm leh zahthlak ang chi kha online hmang chuan a him a, a quality a tha niin an sawi bawk.

Hetih lai hian antibiotic, mutna damdawi leh damdawi thenkhatah chuan doctor remtihna tel lo chuan chah theih a ni lo thung.

Online-a damdawi chahna hi chi hrang hrang awm mah se site rintlak - PharmEasy, Zeelab, eSanjeevani ang license nei chauh hman a him thung a. Mizoram atanga damdawi chah lar zual (natna benvawn) zingah chuan BP sang damdawi, zunthlum damdawi, thyroid leh cholesterol damdawi te an ni a, prescription ngai lo zingah chuan na chhawkna, vitamin leh hritlang damdawi chu chah nasat a ni.

Thudawn danin aizawl khawpuia damdawi zuar thenkhat chuan damlo mamawhte tan home delivery hi an ti thei niin an sawi.

Hetih lai hian India ram puma damdawi zuar intelkhawm, All India Organisation of Chemists & Druggists (AIOCD) chuan inkaihhruaina dan mumal awm loa online-a damdawi zawrh chu a him lo niin an sawi a. Mizorama damdawi zuar intelkhawm, Mizoram Chemists & Druggists Association (MCDA) hruaitute chuan online-a damdawi zawrh kalpui a nih avang hian thalai zingah damdawi hman sual a tam phah niin an sawi a. Hei bakah hian online-a damdawi zuarte hian mipuite hriselna lam an ngaihtuah pha lo a, sumdawnna ngawr ngawr chauh an ngaihtuah avangin damdawi lem pawh a awm niin an sawi bawk.

Online pharmacy a hlauhawm leh hlauhawm loh chungchang zawhna chhangin health department thawktute chuan a pawng apuia a hlauhawm ngawtna tur a awm hran lo va, bungraw dang ang bawka online-a damdawi chah hi a ni mai an ti a. “India-ah hian damdawi tha lo (sub-standard) a tam a, a lem (spurious) hial pawh hmuhchhuah a ni zauh zauh thin a. Online-a damdawi chah a nih hian damdawi tha lo chah chhuah palh theihna chance a sang em em a. Damdawi tha lo a nih palh hlauh chuan a eitu tan a pawi hle dawn a, chu chu a pawina ber chu a ni,” an ti. 

A hlauhawm/pawi theihna tlangpui sawiin prescription lem an siam chawp theih a, chumi hmang chuan ruihtheih thlengin miin an chah thei; antibiotics fimkhur taka hman ngai pawh an chah theih a, pharmacist advice awm lova an hman chuan a pawi thei; damdawi uluk taka vawn that loh, chakna pawh nei tawh lo an rawn thawn thei niin an sawi bawk.

Online pharmacy danin a phal leh phal loh chungchang zawhna chhangin Food & Drug Administration thawktute chuan Ministry of H&FW hian e-pharmacy hi kalpui a tum avangin 2018 e-pharmacy draft notification a tichhuak a, dodalna a awm zui reng a, tun thlengin final a la ni lo va. Final notification a awm loh avang hian online pharmacy hi danah phal a la ni lo tihna a ni tih an sawi.

AIOCD hian he notification, draft stage-a la awm hi a puitlin an duh lo va, tihtawp an duh a. August, 2023-ah ‘The Drugs, Medical Devices and Cosmetics Bill’, Lok Sabha-ah pharh a ni bawk a, he bill hian e-pharmacy kawng a hawng nghal bawk a; mahse, pass a ni ta rih lo bawk. 

Covid-19 pandemic lai khan damdawi lei tura mipui an chhuah theih loh avangin Ministry chuan Doorstep Delivery Notification, 2020 khan a tichhuak bawk a. Hei hi damdawi zuartuten mi ina damdawi an va pek theihna tur a ni.

He notification hi Covid pandemic awm tawh loh hnuah pawh withdraw a ni ta lo va, AIOCD hian withdraw an phut tih an sawi bawk.

Senior Doctor pakhat chuan online hmanga damdawi chah chu thil tha tak ni mahse a him lo thei nia a hriat thu Zalen a hrilh a. “Doctor prescription lem hi siam theih anih avangin misual tan chuan dan phal loh damdawi chah luh theihna a ni a, thil tha tak angin lang mah se a him lo thei dawn hlein ka hria,” tiin a sawi.

Online hmanga damdawi chah thin pa pakhat chuan, “Online hmang hian damdawi ka chah thin a. A man a tlawm bakah a quality a tha a, tualchhung damdawi dawr ami lei tur chuan ka tan a hautak lutuk. Hei bakah a awmsam bawk a, chuvangin online hi hmang tangkai zel ila ka duh zawk a ni,” a ti.

Pa pakhat dang leh pawhin, “Online medicine hi chu khawvel hmasawnna leh changkannain a ken tel a ni a, lo helh vakna tur a awmin ka hre lo. Damdawi zuarte hi an lakna a tlawm ngaihtuahin an hralhna hi a to si a, mi zawng zawngin an chah lem lo a, mi tlem te-in an lo chah hi damdawi zuartute hian an lo helh viau hi a ho ka ti deuh. Thil dang pawh kan chah a, damdawi zuartute pawh hian thil dang an mamawh online kaltlangin an chah ve tho,” tiin a sawi bawk.