Mizoram hi tlangram anih mai bakah state dangte angin industry leh factory lian, boruak ti bawlhhlawh thin te a awm ve lo a. Ngaw a la awm that bawk avangin luitui pawh a la thianghlim tawka ngaih a ni a, mahse hmasawnna lo thang zel leh mihring lo pung chak lutuk chuan kan ram lui te chu kan tih bawlhhlawh tak avangin tunhma lama kan chelek ngailoh 'Packaged Dinking Water' kan tih mai chu a lar ta hle a. Sawrkar, pawl leh mimal thiltih khawmna ah pawh kan chhawpin a tello chuan hun kan hmang thei ta lo. State pawn atangin tui intur engemaw zat kan lalut thin a, mahse tunhnaiah mi thenkhatte harh tharin Mizoram chhungah ngei tui intur siamna hmun an din a. An thil siamchhuah pawh hralh a kalin a siamtute pawhin an hlawkpui viau niin an sawi. Mahse tunhnaiah an thil siamchhuahte a thianghlim tawklo nia thuneitu ten an hriat avangin an tui siamchhuah sa pawh lalet vek tur leh an siamna khawl pawh tifai leh turin an hriattir a, hei mai bakah a thianghlim tawk a ni tih finfiah anih hma chuan siam chhunzawmlo turin an hriattir bawk a ni. Health Department a Food & Drugs Joint Director Lalsawma chuan Mizorama packaged water te chu danin a phut ang an tlinloh avangin lalet a, an tlinlohna te siamtha tur leh an tlin hunah test leh turin an hriattir tih a sawi a. Packaged water siam zingah hian Koinonia leh Amawii chuan enfiah leh an cho avangin an tui sample chu Assam Public Health Laboratory, Guwahati, Assam ah an thawn leh mek tih Zalen a hrilh a, a dang pawh a siamtute an inpeih veleh a sample te enfiah turin an thawn leh dawn niin a sawi. Lalsawma chuan Mizoram tui te mai nilo, phai lam atanga lo lutte pawh enfiah turin Guwahati ah hian an thawn mek nia sawiin a thianghlim tawk loh chuan Mizoram ah zawrh an phal dawn lo tih a sawi a, Guwahati a Laboratory chu hmarchhak bialten an intawm anih avangin duh angin an hmanhmawh thei thin lo niin a sawi bawk. State dang atanga packaged water lalut thin tu Lalrinsanga chuan tunhnaia Mizoram siamchhuah mineral water te tihtawp anih avangin an tui lakluh thin chu a pung nasa hle niin Zalen a hrilh a. Tui an lakluh thin chu thlasik leh nipui ah a inanglo nia sawiin an tui lakluh zingah Bisleri chu hralh a kal ber tiin hralh a kal chhan hi mineral water anih bik vang nia a hriat thu a sawi bawk. Tui intur zuar thin dawr nghaktu pakhat chuan Mizoram siamchhuah tui te tihtawp anih avangin mi tam takin harsatna an tawk tih a sawi a. Workshop leh thiltih khawm reng rengah pawh an ring deuh chawt zel tih sawiin thla khatah box 60 te an hralh thei thin niin a sawi bawk. Pa pakhat pawhin mineral water/package water chu a tangkai hlea a hriat thu sawiin, "A man a tlawm a, midang tibuai lova pai/ken mai theih a ni hi a tangkai ka ti a, tunhma khan engtin nge kan lo awm theih ka ti hial a ni," tiin Zalen palai a hrilh bawk. Aijal Club thawktute chuan an mikhual ten an duh deuh bik avangin packaged water zingah Bisleri an la deuh kher thin niin an sawi.