FEATURE - Padma Shri Lalbiakthanga Pachuau

Admin - Nov 14, 2021

India rama working journalist upa ber

Sawrkar laipui chuan India khua leh tui zinga hnathawk thate hnenah chawimawina a hlan thin  Padma Shri tunhnaia neihah Mizo zing atangin mi pathum - Lalbiakthanga Pachuau, C.Kamlova leh B.Sangkhumi te chuan Padma Shri chawimawina hi an dawng a ni.

Kumin Mizo zinga Padma Shri dawngtu Lalbiakthanga Pachuau hi kumin Award dawngtu zinga upa ber nia hriat a niin ‘Literature & Education- Journalism’ hmanga award hi dawng a ni.

Lalbiathanga Pachuau chuan Padma Shri a dawn theih chhan chu “Van lam atanga chawimawina lokal a ni,” a ti.  India rama working journalist upa ber a nih avang leh a thlawna thisen pek kawnga hma an lo lakna vang nia a hriat thu a sawi a ni.

Lalbiakthanga Pachuau hi khawtlang leh kohhrana mi tangkai a ni a. Tunah hian kum 95 mi a ni tawh. 

Kum 17 chhung India sipaiah a tang a, havilder-in kum 1962 khan a pension a ni. Sipai-a a tan lai hian Indopui II-naa a tel ve bakah 1948 leh 1950 inkara Jammu & Kashmir indonaah a tel a. Sipai chawimawina medal/award panga a dawng a ni.

Journalism khawvelah kum 1970 khan zuanglutin Zoram Tlangau enkawltu zingah a tel a, joint editor-te a nih hnuah kum 1981 khan editor nihna chelhin tun thlengin he nihna hi a la chelh a ni. MJA president a nih laiin Aizawl Press Club neih theih nana hma lain, a building lungphum phum a ni.

Mizorama a thlawna thisen pek kan uar lehzual theih nan Association for Voluntary Blood Donation dintu zingah telin general secretary hna a chelh a.  Kum 1980 chho khan ruihhlo leh zu laka khawtlang leh thalaite an him theih nan Mizoram Social Defence Union (Sual Do Pawl) an din a, ruihtheih thil tihtlem kawngah hma nasa takin an la a ni. 

Kum 1975-a Mizoram State Cooperative Union din a nih khan president hmasa ber niin kum 1988 thleng a chelh a.  

President a nih tan kum hian National Co-operative Congress, Delhi a neihah Mizorama Co-operative Apex Bank din ve turin dilna a thlen a, kum 1982 khan Mizoram Cooperative Apex Bank hi din a ni ta a ni.

Award hi ruahmanna hmasa ah chuan March 26,2020 a hlan tura tih a ni a, mahse hrileng vanga inkharkhip puan anih avangin November 8,2021 khan President chuan a hlan a ni.

Share now