India ni pawimawh pahnih Independence day leh Republic day lawmnaah parade neih thin a ni a, tun hnaia Lammuala parade neihah tlu an tam thin avangin sawi zui a hlawh hle a. Nikum Independence day lawmna ah phei kha chuan tumdang zawng aiin tlu an tam a, hemi kaihhnawih nia ngaihah naupang pakhatin vanduaina a tawh bawk avangin Mizoram titi a tling hial a nih kha. Kumin Independence day-ah erawh chuan Aizawl DC ruahmannain Aizawl civil hospital nen tangrualin parade-a tel tur school naupang leh NCC naupangte chu an hriselna endik a ni a. Naupang 760 endik zingah 95 chu an fit tawk lo nia hriat avangin parade-a tel lo tura tih an ni a, hetia enfiah hmasak an nih vang nge ni, kumin ah chuan parade laia tlu an tlem a. Hriat theih chinah mi 8 chu tlu/zawnchhuah an ni a, heng mite hi an vaiin hmeichhia an ni a, medical duty te sawi dan chuan heng naupang tlute hi pumpui hnun na leh pum ruak te an ni tlangpui a ni. Thudawn danin nikum 2016 a Independence Day lawmnaah khan parade a tel field atanga zawn chhuah kha Mizoram pumah mi 149 an ni a. Aizawlah 50, Champhaiah 30, Serchhipah 30, Lungleiah 20, Kawnpuiah 13, Sangauah 4, Mamitah 2, Siahaah 1 te zawn chhuah an ni a. Hriat theih chinah nikum Independence Day kha field atanga zawn chhuah an tam ber kum a ni a. Nikuma Independence Day lawmnaah khan Kolasib leh Lawngtlaiah te chauh zawn chhuah ngai an awm lo a ni. Mi thil chik mite sawi danin tunhma lam deuh kha chuan Independence day leh Republic day ah te hian khuallianten thu an sawi rei thin avang leh ni a sat avangten tlu an tam thin a. Zirlaite pawh zing atanga ground-ah dintir an nih thin bawk avangin an chau tawngkhawng nia an hriat thu an sawi a. Mahse kumin Republic Day atang khan tih dan thlakin parade a tel tur zirlaite chu field chhungah hun rei lo thei ang ber an din theih nan zing dar 9-a progrmme tan tur chu dar 8:45 velah chauh field-ah luhtir an ni a. Larsap-in minute 20 vel thu a sawi chhungin mi 12 zawnchhuah an ni a. Independence day-ah hian Chief Minister-in minute 25 vel thu a sawi chhungin mi 8 zawnchhuah leh an ni. Heti tak maia tlu an tam thin chu ngaimawhawm hlea a hriat thu Doctor pakhat chuan Zalen a hrilh a. “Naupangte ah hian tih tak zeta tumna a awm tawk lo niin ka hria a. Hei bakah hian taksa sawizawi kan uar lo a, ei leh in kan ti nasain thlum leh thau kan ei nasa bawk hian min ti hrisel lo niin kan hria,” a ti. Kumin Republic day-ah pawh sipai pension, kum 90 tling tawhte pawh an dintluan theih laia in-fit zawk tura ngaih school naupang engemaw zat zawnchhuah ngai an awm chu zahthlak zawk hlea a ngaih thu a sawi bawk.