Mizoram sawrkar, General Administration Department (GAD) chuan Mizoram chhung a pisa te bakah state pawna Mizoram House-a pisa kai hun te a bithliah thin a. Mizoram chhungah chuan nipuiah zing dar 9 atanga tlai dar 5 leh thlasikah zing dar 9 atanga tlai dar 4 turin a ti a, Mizoram pawna Mizoram House te erawh chu an awmna hmun a zirin pisa kai hun chhung hi a inang lo thung. Mizorama pisa hrang hrangte chuan pisa kai hun chhung (office hour) hi an zawm tha lo hle tih Zalen palaiin office hrang hrang a tlawhnaah a lang chiang hle. GAD Secretary Zothankhuma chuan office hnathawkten hun an vawndik theih nan hma lain ruahmanna an siam mek niin a sawi. Tunhma deuha office hrang hrangte endik thin (surprise check) ang kha tun hnaiah an neih leh neih loh chungchang zawhna chhangin GAD thawktute chuan ‘Tun hnaiah an nei lo’ tih an sawi. Office dawr thin pa pakhat chuan, “Football etc. champion lawmna ang chi Lammual ah te a awm tuma sawrkarin a tel duh tan chawlh (eg. half holiday) a puan denchhena pisa a ruak huai mai thin leh kal an tlem leh hle te hi tha ka ti lo hle a. Hei mai bakah sawrkar hnathawkte hian office hour hi an ngai pawi mawhlo lutuk niin ka hre bawk a, zing dar 9 office tan a nih laiin a chang chuan dar 10-ah pawh dawr tur mumal an awm loh chang a tam mai a, tlai lamah nise dar 5 bân hun pawh nise office tam takah chuan dar 4-ah pawh dawr tlak mumal an awm tawh lo hi chu a dik lo hle mai. Hei hi corruption dik tak niin ka ngai,” a ti. Private hnuaia thawk ten hun an hman dik theih viau laia sawrkar hnathawk ten hun vawndik an ngai pawimawh lo tlat mai chu tha lo hlea a hriat thu a sawi bawk. Sawrkar hna Head Assistant atanga tun hnaia chawl ta pa pakhat chuan, “Kei chu ka thiamna ngaihtuah hian hlawh hnem ka inti hle a; chuvangin, office pawh hi ka ngai pawi mawh a. Ka thawhpui te hun vawng dik tura kan hauh deuhte hian mi huat phah nan an hman bakah mi sual nih hi kan hlawh leh mai thin a, a buaithlak khawp mai,” a ti. Hei mai bakah Kohhran leh NGO-a inhmang takte chu chhuahvahna tur an ngah avangin office ah pawh an thahnem lo deuh nia a hriat thu a sawi bawk. Hetih lai hian Mizoram sawrkar hnathawk sing tel zingah hian tha tak tak, hun vawng dik, taima leh mi dangte tanpui peih mi engemaw zat an awm a. Mahse, office hun vawng dikte hi mi fel nih aiin mi â nih an hlawh zawk fo thin. Kan ngaihtuahna a dik a, mipui pawhin sawrkar hnathawkte hi hun vawng dik tura kan duh tak zet hunah chuan hun an vawng dik turah ngai ang. Tun dinhmuna kan phak tawk kan ti hrih mai dawn em ni?