Hman khat daih sarang (Single Use Plastics) chu khawvelin a chhiatpui avangin sawrkar laipui chuan July 1, 2022 atang khan a khap a. Mizoramah pawh he khapna dan hi kenkawh nghal ni mah se mipuiten an la zawm tha tawk lo hle a, bazar leh sumdawnna hmunah te hmang an la thahnem hle.

Mizoram Pollution Control Board Member Secretary leh hman khat daih sarang khap kawnga mawhphurtu State Special Task Force-a Secretary ni bawk Er. C.Lalduhawma chuan, “Single use plastic hi hmang lo tura GAD-in department hrang hrangte a hriattir avangin sawrkar office-ah te chuan zawm a hlawh hle a. Mahse, hetih lai hian bazar leh dawr tam tak chuan an la zawm tha lo hle a ni,” a ti.

Er. C.Lalduhawma chuan, “July 1, 2022 atang khan 75 micron chin chu khap a ni a. He khapna hi sawrkar office bakah airport, rel station leh industry te kan endikna ah chuan zawm a hlawh hle a. Mahse hetih lai hian he dan kenkawh kawngah kan chak tawk lo deuh nge ni central-a kar tin report kan pekah chuan man kan la nei lo tiin kan report thung,” a ti a. Plastic pan chi chu dawr tam takin an hmang tawh lo nia sawiin coffee dawrte pawhin paper cup an hmang a, catering ti thinte pawhin plastic an hmang tawh lo niin a sawi bawk.

Plastic lam zuar thin dawrkai nu pakhat chuan sawrkar laipuiin plastic a khap avangin thleng, plate leh no te chu phai lam atangin a lo thleng ngai tawh lo tih sawiin anmahni pawhin zawrh tur an nei tawh lo niin a sawi a. “Mi thenkhat plastic no leh thleng rawn zawng hi an awm leh zauh zauh a; mahse, kan kawl tawh loh avangin a aia to deuh paper thleng leh kuhva kawr atanga siam te an lei mai thin a. Thenkhat chuan to an ti deuh thin a ni,” a ti.

ZALEN-in pa pakhat a biaknaah chuan sawrkarin plastic a khap chu lawmawm a tih thu sawiin kan ram leilung a tihchhiat dan ngaihtuahin khap awm tak nia a hriat thu a sawi a. Chutih rual erawh chuan dan kenkawh kawngah sawrkar a chak tawk lo erawh pawi a tih thu a sawi ve thung.