Mizoramah tun hma atangin ramhmul damdawi hman a ni tawh a. Mizo pi leh pute kha thil chik tak mai an niin dam loh nikhuaa inenkawlna tur thing/hnim chi hrang hrang an hre hnem hle a. Damdawi mai bakah ei chi leh ei loh chi te, thiang leh thiang lote pawh hre tak an ni. Hmanlai atang tawha Mizo damdawi lo hman thinte chu khawvel changkang zelah mi tam takin hnualsuat mah se tun thlenga damdawi pangngai aia la ring leh hmang an la awm zel a; mahse, a pawimawh ta ber chu heng Mizo damdawite hi a thain a him chiah em tih hi a ni awm e. Mizoram State Medicinal Plant Board-a Chief Executive Officer Dr. C.Lallunghnema chuan, “Mizo damdawi hi a tha em em a; mahse, a siam dan hi a him rih loh avangin ei loh a tha ber a. Kan ei dawn anih pawhin mi dang siam ni lovin mahni ngeiin kan siam hi ei ila a him ber a ni,” tiin Zalen a hrilh. Dr. Hnema chuan ramhmul damdawi siam leh zuar thinte khuahkhirhna dan an duang mek nia sawiin hei hi peih a nih hun chuan tuna zuar tam tak chuan an tlin dawn lo niin a sawi a. Ayurvedic damdawi zawrh chu phal ni mah se license nei lova lo siam ve chu danin a phal lo nia sawiin Mizoramah chuan an siamin an zuar bawk a, hei hi dan bawhchhiatna a ni tih Zalen a hrilh bawk. Dr. C.Lallunghnema chuan Mizoram ah ramhmul damdawi zuar an awm tho avangin a zuarte chu kokhawmin man theih an nih thute an hrilh thin tih a sawi a. An thil siamchhuahte chu Zemabawka Ayush testing Laboratory-ah a thianghlim leh thianghlim loh an test thin tih sawiin Mizorama ramhmul damdawi awmte chu state danga mi aiin a tha zawk niin a sawi bawk. F&D Jt. Director Lalsawma chuan ramhmul damdawi thenkhat chu damdawi pangngai (allopathy) aia tha zawk pawh a awm nia sawiin Mizopa damdawi thenkhat chu chawilar thaa a hriat thu a sawi a. Mahse, ramhmul damdawiah hian mi thenkhatten allopathy an tel thin nia sawiin a him chin a nih leh nih loh hriatthiam a har avangin thil pawi tak a thlen thei a ni, tiin Zalen a hrilh. Lalsawma chuan tunlaia mi thenkhatten ramhmul/ tualchhuak damdawi an siam thin chu khuahkhirhna hnuaiah phalna nei thlapin siam nise a himin mipui pawhin an chhawr tangkai zawk a beisei tih a sawi bawk. Ramhmul damdawi ei thin pakhat chuan tualchhuak (ramhmul) damdawi chu a damna muang deuh mah se side effect a awm ve loh avangin a duh zawk tih a sawi a. Mizorama ramhmul damdawite chu humhalh a, a neitu nihna hauh (patent) tura tanlak nise a duh tih sawiin hetia hmalak vat a nih loh chuan a neitu nihna chu midang kutah a awm mai a hlauh thu a sawi bawk. Tarlan tawh angin Mizorama ramhmul damdawite hi a tha em em a. Mahse, a siam leh zuartute hian an sawngbawl dan hi a him em? Damna atana kan lei thin ramhmul damdawite hi a sawngbawlna thianghlim loh avangin damlohna min thlentu zawk a ni thei mai em tih chu zawhna lian tak a ni. Khap tak tak theih a nih loh bakah mi tam takin kan ei reng tho avang hian tuna kan mamawh ber chu a sawngbawl dan thianghlim hi niin a lang.