ZALEN 26th May: Chetan Kumar Shrivastava, General Manager, NF Railways leh a thawhpuite chuan May 21, 2024 khan Chief Minister Lalduhoma kawmin Bairabi leh Sairang inkara rel kawng an siam mekah mi sualin an thir an ruksak nasa em em mai tih sawiin hetiang hi state dangah a thlen ngai pawh an hriat loh thu a sawi a. Gas hmangte-a cut-sakin an bolt te, an bearing te a bo nasa a, motor hmangtein an phur chhuak hial thin a, an mangang hle tih a sawi a. Hetiang reng a nih chuan lei (bridge) tam takte hi chhiatna nasa zawk tawk thei an ni tiin rukrute vanga an harsatna a thlen a. Rukruten an thil an ruksak hnu thlalak thahnem tak a entir a, FIR an thehlut thin tih an sawi bawk.

Rel kawng siamna hmanrua bo chungchangah hian ZALEN chuan dan leh thupek kengkawhtute a bepawp nghal a. Sairang Police Station thawktute chuan an huam chhungah rel kawng siamna ni kher lo thirchhe bo neuh neuh report chu a awm nual nia sawiin thil bo chungchangah hian man pawh an nei nual tawh a, tunah hian thirchhe bo chungchangah jail-a tang mek mi panga an awm niin an sawi a. Kawnpui Police Station pawhin thir bo chungchangah hian case register a awm nual tawh tih sawiin kuminah pawh case hi pathum register a ni tawh a, case pakhat an chhuinaah hian tual chhung mi hmeichhe pathum thirchhe zawng thin chu man an ni tih an sawi.

Chhinchhiah danin Kawnpui P/S hian thir ruk bo kgs 400 an hmu let a. FIR an dawna rel kawng siamna thir bo zawng zawng hi Rs. nuai 17 hu nia chhut a ni.

Rel kawng siam meka hmanrua ruk bo a nih thin chungchangah hian February thla tawp lam khan Kawnpui PS-ah Kawnpui Joint VC leh police chuan thirchhia lei thinte an kokhawm a, police-te chuan rel kawng siamna hmanraw bote hi report an dawn angin chak taka bawhzui zel a ni dawn tih leh a rutu leh lo leichhawngtute chu dan angin an um zui zel tur thu an hrilh.

Railway hotupa thusawi hian sawi zui a hlawh a, mi thenkhatin heti tak maia Mizoten hmasawnna hnathawhna hmanrua an ruksak hi pawi an ti a. Thenkhat erawh chuan hei hi thudik tawk lo, Mizo mipuite tihhmingchhiat tumna mai ni-ah an ngai a, thu dik tak hriat a har hle.

Hetih lai hian pa pakhat chuan Railway hotupa thusawi chu thudik tawk lo nia a hriat thu ZALEN a hrilh a. “Rel kawng siamna thir lo la tawkte hi chu an awm a; mahse, heng thirte hi chu rel kawng siamtute kalsan tawh, leia inphum an laihchhuah te a ni a. Rel kawng siamtute hian security pawh an ruai a, chumai bakah an thil bo nia an sawite hi mi 4/5-ten an zawn ngai, crane hmang lo chuan laksawn theih loh te an ni a. Chuvangin, rel kawng siamtute hi thir bo chungchangah hian an inhnamhnawih em aw tih a awl a. An hna zo hleithei lo chhuanlam mai mai niin ka hria a ni,” a ti ve thung.