Reserve Bank of India (RBI)-in Rs. 2,000 note thleng theih hun tawpa ruahman, October 7, 2023 thleng khan State Bank of India chuan eng emaw zat an dawng a. Bank-a thleng hi tihtawp ni tawh mah se RBI chuan hmun ruat bikah thleng a la phal a. Mizoram atanga RBI hmun hnai ber, Guwahati-ah chuan a la thleng theih a ni.

RBI chuan kum 2016 atang khan Rs. 2,000 note hi a siam chhuak tan a. May 19, 2023-a hnuh kir a tum thu a puan atangin leh bank-ah thleng theih a ni tih hriattirna a tihchhuah atangin mi eng emaw zatin bank-ah an thleng a. Customer thenkhat chuan an account-ah an thun lut (deposit) a, thenkhat chuan pawisa note tê zawkin an thleng thung.

SBI Main Branch, Aizawl thawktute chuan Aizawl bakah Kolasib, Serchhip, Lawngtlai, Saiha leh Lungleiah thleng a nih avangin a zat chiah an hre thei lo niin an sawi a. Bank hrang hranga Rs. 2,000 note an thlengte chu SBI-ah a lutkhawm thin niin an sawi.

Rs. 2,000 note tihtawp a nih chhan sawiin SBI thawktute chuan, “Rs. 2,000 note hi chheprelh a awlsam vangin mi sual tan thuhruk a awl a. Chubakah pawisa lem a lo awm palhin sawrkar tan chânna a nih theih bakah mi retheiten lo dawng palh se chhiatna a ni thei bawk a. Rs. 2,000 note hi Rs. 500 note tihthih a nih avanga mipui buai lutuk loh nana siam a ni a, tunah Rs. 500 note a chhuah leh tak tho avangin a awm reng hi a tul lem lo a ni,” an ti bawk.

RBI-in Rs. 2,000 note thleng theih hun tawp ni tura a ruat chu September 30, 2023 kha a ni a; mahse, October 7, 2023 thleng pawhsei leh a ni a. Chhinchhiah danin RBI chuan May 19, 2023 khan Rs. 2,000 note hi Rs. vbc. 3,56,000 siam chhuah a ni a. Hriat theih chinah 96% chu bank-ah kir tawh a ni.

September 30, 2023-a RBI thuchhuah tar lan danin bank-a Rs. 2,000 thleng theih hun tawp hnu, October 8, 2023 atang chuan mipuiten RBI Regional Office thlan bik 19 - Ahmedabad, Bangalore, Belapur, Bhopal, Bhubaneswar, Chandigarh, Chennai, Guwahati, Hyderabad, Jaipur, Jammu, Kanpur, Kolkata, Lucknow, Mumbai, Nagpur, New Delhi, Patna leh Thiruvananthapuram-ah te chauh an thleng thei tawh dawn niin a sawi.

Rs. 2,000 thleng chungchangah pawh limit siamin mi pakhat tan Rs 20,000 thleng bak thleng theih a ni dawn lo a ni.