Mizoram-ah dan leh thupek kengkawhtu chi hrang hrang an awm a, chung mite chuan mahni hma zawn theuhah hna an thawk a. Chung hnathawk zinga Excise & Narcotics Department, Mizoram Police leh Assam Rifles-te chuan hun eng emaw chen atang khan ruihhlo chi hrang hrang an man chho mawlh mawlh mai a. Heng ruihhlote hi a tlangpuiin Mizoram pawna kalpui tur an ni a; mahse, Mizoram chhunga tihral pawh thahnem tak a awm bawk.

Excise & Narcotics Department, Mizoram Police leh Assam Rifles ten ruihhlo an man zinga tam ber chu heroin (No. 4) a ni a, a lo kalna ber chu khawchhak lam atangin a ni a, Assam atang pawhin lo let eng emaw zat a awm bawk.

Heroin bakah hian tun hnaiah methamphetamine thahnem tak man a awm fo a, a khât tawkin ganja pawh an man bawk.

ZALEN zawhna chhangin Excise & Narcotics Department thawktute chuan heroin chu khawchhak lam atangin a lo chhuk nasa hle niin an sawi a. “Mizorama heroin 90% vel hi chu khawchhak lam atanga lo chhuk a ni a, khi lamah khian dan leh thupek kenkawh mumal a nih si loh avangin leh Tiau dai kaina hmun hrang hrangah a tam bawk avangin hmalak a har hle a ni,” tiin END officer pakhat chuan a sawi.

Tunlai hian heroin hawng khat hi Rs. 28,000 atanga 30,000 inkarten an lei thin nia an hriat thu sawiin heroin hi hmuh a awlsam avangin ti thar an tam hle nia an hriat thu an sawi.

Tun hnaia ruihhlo an man chi khat, methamphetamine chu Mizo thalai zingah ti an awm tam lem lo tih sawiin heng ruihhlo an mante hi chu Middle East leh Bangladesh lama kal tur niin an sawi a. Meth hnathawh dan chu Mizote duh zawng ni lem loa an hriat thu sawiin Arab ram velah erawh ti an tam hle niin an sawi.

Methamphetamine chu golden triangle mai bakah Myanmar ram chhung, Mizoram ramri atanga hla lutuk lovah pawh a siamna a awm nia an hriat thu END thawktute chuan an sawi a, meth chu damdawi hlauhawm tak a ni tih sawiin mut theih lohna leh ruh chuktuah na te an nei thin a, tih loh a him ber tih an sawi bawk.

Ruihhlo chi khat, ganja leh khuh damdawi pawh tunlai thalai zingah a hluar hle tih sawiin ‘rin phak bakin zirlai zingah ti an tam’ tih an sawi a. Ganja chu Shillong lam atanga lo chho a tam ber nia sawiin Manipur leh Tripura lam atang pawhin lo lut a awm bawk niin an sawi.

Tun hma deuh khan Shillong-a lehkha zir thenkhat chu ruihhlo hmanga sumdawngte hian pawisa hlawha an ruihhlo keng tur hian an ruai thin a, man tawk leh case nei pawh eng emaw zat an awm a ni.