Mizoram ah kum 1984 vel atangin ruihhlo vanga nunna chan kan hre tan a, a do hna sawrkar leh tlawmngai pawlten nasa takin thawk thin mah se ziaawm lam a pan thei lo a, kumtin thalai mi engemaw zatin an thihpui reng ta mai. Excise & Narcotics department chhinchhiah danin kumin kumtir atanga March 12, 2018 inkar chhung khan damdawi hmansual (ruihhlo) vanga thi hi mi 11 an awm tawh a, an zinga 9 hi mipa niin hmeichhia 2 an awm bawk. Ruihhlo ti thinte thihpui tam ber hi heroin a ni a, kumina ruihhlo vanga thi mi 11 zinga 5 te hi heroin kaihhnawiha thi an ni a, 1 hi alprozolam niin a dang 6 hi heroin leh a dang tihkawp te an ni. Nikum chhung khan ruihhlo vang hian mi 53 an boral a, heng zinga 37 hi heroin ti thinte an niin a dang pawh hi heroin leh thildang tihpawlh te an ni a. Tunhma lama ruihhlo ti thinte thihpui tam ber proxyvon chu a siamdan thlak danglam anih avangin thihpui an awm ta lo nia thudawn a ni. Central YMA in ruihhlo do tura a din Supply Reduction Service (SRS) hruaitute chuan heroin chu nikum lam aia a man a tlawm avangin tleirawl zingah ching thar an tam hle niin Zalen an hrilh a. Heroin chu khawchhak lam atangin a lokal thin nia sawiin Zokhawthar leh Champhai maxi cab (sumo) driver-te chu hlawh tha tak siamsakin a zuartuten an phurhtir a, hawng khat zelah Rs. 3000-te hlawh siamsakin hawng 5 te an phur a, tum khatah an thla khat hlawh let te an hmu thin tih an sawi. SRS hotute chuan tunlai hian heroin hawng 1 Rs. 35,000 vel a ni tiin a zuar chhawngte chuan Rs. 87,500 velah te an chhuah leh thin niin an sawi a. Heroin zuarte chu man an har hle nia sawiin man an nih pawhin sum an ngah a, Ukil te ruaiin an chhuak leh mai thin niin an sawi bawk. SRS hotute chuan zu thlah zalen hma aiin thlah zalen hnuah heroin a hluar nia sawiin tunhma lama Rangvamual leh Tuiriala zu zuar thin khawchhak lam mi te chu heroin zuarah an inlet a, khawchhak lamah hmelhriat an neih that avangin awlsam zawkin an hmu thei niin an sawi bawk. SRS 6th batch te hian ni 24.2.2018 atang khan hna thawk tanin heroin hawng 32 an man tawh a, ruihhlo kaihhnawih ah mi 211 manin home ah 8, excise-ah 8 pein counselling turin mi 55 an ti bawk a, AIKO thawktuten counselling hi an tihsak thin a ni. Excise & Narcotics department thawktute chuan heroin chu a awm reng chungin ti thar an pung hran lo niin Zalen an hrilh a. Heroin man chu nikum lam aiin nasa takin a tlawm tih sawiin kumin kumtir lam phei chuan hawng khat Rs. 15,000 te a ni hman niin an sawi. Damdawi hmanga inchiu thin pakhat chuan tun hnaiah ruihhlo ti thar an tam hle niin Zalen a hrilh a, zirlai naupang zingah pawh a ruka ti an tam niin a sawi. Tunlaia damdawi ti hovin an tih nasat ber chu heroin nia sawiin alprozolam pawh ti an awm nual niin a sawi a. Heroin chu a man a tlawm nia sawiin hmuh a awlsam hle niin a sawi bawk.