ZALEN January 18, 2026: Sairang Rel Station hawn a nih hnuah phai lama zin chhuak khualzin an tam bakah state pawn atanga Mizoram tlawhtu khualzin an pung nasa hle a. Tlawhtu an pun avangin anmahni hruai kualtu tur (tour operator) indaih lohna leh mamawhna a sang hle niin tourism department chuan an sawi. Transport dept. leh khawtual mi sum lakluh pawh a pun phah.

Rel station hawn a nih hma hian Bairabi atang pawhin rel hmangin state dang hi tlawh pawh theih ni mah se rel chhuah hun hi a hma avangin Mizoram atanga zin chhuak leh tlawhtu an tam vak lo a; mahse, Prime Minister Narendra Modi-a’n Sairang rel service a hawn hnuah zin an tamin mipuiin rel an chhawr tangkai hle.

Transport department chhinchhiah danin September 13, 2025-a Sairang Rel Station hawn a nih hnuah Railway Out Agency, Aizawl chuan ticket an hralh tam tawh hle a, January 15, 2026 thleng khan ticket hi 24,000 chuang an hralh tawh a, heta tang hian Rs. nuai 150 chuang hmuhchhuah a ni tawh bawk.

Transport department chhinchhiah danin nikum September thla khan Sairang Rel Station atanga state dang pan tur ticket an hralh chhuah atangin Rs. 20,95,320 hmuh a ni a. October, 2025-ah Rs. 56,93,055, November 2025-ah Rs. 40,74,805, December, 2025-ah Rs. 22,72,695 leh January 15, 2026 thleng khan Rs. 9,36,280 hmuh a ni tawh a. September 15, 2025 atanga January 15, 2026 inkara rel ticket an hralh chhuah tawh zawng zawng chu 24,187 tling tawhin, heta tanga sum an hmuhchhuah tawh zawng zawng chu Rs.1,50,72,155 a tling tawh bawk a ni.

Transport department thawkte an sawi danin Aizawl-a Railway Out Agency atanga rel ticket an pek chhuah zingah hian a tam ber 50% chuang chu Sairang leh Guwahati inkar rel service ticket la an ni a, Kolkata service ticket lain a dawt a, Delhi service hi chu a la lun lutuk rih loh niin an sawi.

Railway Out Agency, Aizawl hi November 14, 1975-ah ding tanin May 22, 1997 atang khan computerized ticket booking hawng tanin India ram hmun hrang hranga zin duh tan rel ticket an pe chhuak thei a ni. 

Sairang thleng relin a thlen takah chuan kawng tam takah an chhawr tangkai laiin harsatna pawh a thleng ve niin Sairang VCP PC Lalrindika chuan ZALEN a hrilh a. Rel an tangkaipui dan sawiin, “Sairang leh a chheh vela home stay leh restaurant mai bakah dawr pawh a lun hle a. Hei mai bakah hnam dang lo thleng thenkhat ILP dil thiam lote awmin chung mite ILP dilsak chuan thalai tam tak an inhlawh a. Khualzinte vangin lirthei chi hrang hrang taxi, maxi cab, auto rickshaw leh commercial vehicle ten tlanna an hmuh tam phah a ni,” a ti.

Rel hi tangkaipui viau mah se harsatna thleng pawh a awm nia sawi bawkin, “Rel a lo thlenin pasenger phurh inchuh kawngah khawtual leh hmun danga lirthei neitute inkarah inhnialna leh buaina neuh neuh a awm fo thin a. Khualzin an tam vang hian hmeichhia leh tute emaw fel vak lo mikhual chang kan neih fo bakah rel din hmaa ILP nei lo rel atanga zuang thla hi an awm thin a, hei hian khawtlang leh police lam pawh min tibuai ve fo thin a ni,” a ti bawk.

Bairabi–Sairang rel kawng 51.38 km a thui siam hna hi November, 2014 atangin thawh tan a ni a, zawh hun tura ruahmanah zawh hman a ni lo a. September 13, 2025 khan Prime Minister Modi-a’n Lengpui Airport atangin a hawng a ni.

Sairang atang hian Aizawl–Delhi Rajdhani Express, Aizawl–Kolkata Express leh Aizawl–Guwahati Express te tlantir thin an ni.