Assembly House Annexe a neih mek Regional Saras Fair chu mipuiin an hlutin tlawhtu an tam thei hle a, stall hrang hrang atang hian nitin nuai 3 chuang an hralh ziah niin a buatsaihtu te chuan an sawi. Zalen palaiin stall hrang hranga tlawhna ah chuan zufang leh zupui zawrhna stall chu a lun ber niin a lang a. Zufang zuar nu pakhat chuan tunah chuan hralh tur a nei tawh lo niin a sawi a, a thiante pawhin an kensa an hralh zawh tawh avangin an chah belh leh mek niin a sawi bawk. Fair tlawhtute hian a tlangpuiin nitin mamawh leh chawhmeh an lei nasa hle a, Mizo thuam hrang hrang leh puan pawh hralh a kal hle. Bilkhawthlir RD Block atanga tel leh kuhva kawr hmanga thleng siamtute chuan an thleng phochhuah (disposable plate) chu hralh a kalin order pawh an hmu tam hle tih a sawi a, tunah phei chuan order an hmuh tam avangin an lakbelh thei tawh lo niin a sawi bawk. Fair buatsaihtute chuan tun tumah hian MzSRLM-in self help group a neihna RD Block 17 atangin kuthnathawkte an lo kalkhawm tih an sawi a. An kal man bakah stall an luah man tumsak an ni a, hei mai bakah hian nitin DA Rs.200 leh an thingpui in man atan Rs. 50 pek thin an ni tih an sawi a. Saras Fair chu Aizawlah tum 3 leh Kolasib-ah tum 1 buatsaih tawh a ni tih an sawi. Zalen zawhna chhangin MzSRLM hotu Chief Executive Officer Lalchhandami chuan Saras Fair chu mipuiin an tangkaipui hle tih a sawi a, tun tuma kuthnathawktu lo tel te pawh an lawm hle niin a sawi bawk. Regional Saras fair neih mekah hian dawr (stall) 102 siam a niin stall 100 luah a ni a, Aizawl district IWMP ten stall 3 an luah bak chu MzSRLM hnuaia self help group ten an luah vek a ni. Saras fair hi December 5, 2017 khan Rural Development Minister R.Lalzirliana chuan a hawng a, fair hian December 15, 2017 thleng a awh ang.