ZALEN June 28, 2026: India hi a indan tirh atangin hel pawl leh inlak hran tum pawl chi hrang hrangin an tibuai nghal a. Jammu & Kashmir, Punjab leh hmarchhak state-ah hel pawl chi hrang hrangten harsatna an siam a. Punjab buaina, Maoist harsatna siam thin leh hmarchhak state buaina chu chin fel thawkhat a nih laiin Kashmir erawh vawiin thlengin a la buai hle.

A khât tawkin Kashmiri helten India ramah buaina chi hrang hrang an siam thin a. November 26, 2008 khan Lashkar-e-Taiba (LeT) hel 10-te chu Mumbai khawpuiah lutin rel chawlhna hmunpui, hotel leh mipui punkhawmna hmunte an bei a, mi 166 thiin hliam tam tak an awm a. Hel pakua thah an ni a, an zinga pakhat, Ajmal Kasab chu man a ni.

Hemi hnu hi chuan helte hian India-ah buaina liantham an siam lem lo a; mahse, nikum mai, April 22, 2025 khan Pakistan-a inkhuar hel pawl chuan khualzinte tlawh thin hmun nuam tak mai, Kashmir-a Baisaran phaizawl, Pahalgam-ah che lehin pawisawi lo mi 26 an tihlum a. He thihna thlenga a mawhphurtu hi LeT hnuaia inbawl hrang, ‘The Resistance Forces’ nia inchhalte an ni.

Hei hian India leh Pakistan inkar pawh a tihchhiat phahin indona tenau a chhuak a, vawiin thlengin nghawng a la nei zui zel a. India chuan he inbeihna hi a ngai thu tak hle a, pawisawi lo nunau thattute hi a umzui zel bawk a. Hel pawh mi eng emaw zat tihhlum niin hel beihnaa huaisen taka thawktu, Mizo tlangval, Captain Lalrinawma Sailo hnenah sipai huaisen chawimawina hlan a ni.

Captain Lalrinawma Sailo hi kum 1999 khan Aizawla Chanmari Vengah a piang a, a pa chu Saihmingliana Sailo a ni.

Rashtriya Indian Military College-ah a zir a, a zir zawh hnuah India-a sipai officer training-na hmun tha ber, National Defence Academy a zawm a, kum 2021 khan Indian Military Academy, Dehra Dun-ah sipai officer atan lak luh niin India-a sipai battalion hmingthang bera ngaih, 4 PARA Special Forces-ah a lut a ni. 

Pahalgam pawikhawihna thleng hi India sawrkar chuan enliam mai a tum lo hle a, a ruk thei ang berin beih let dan tur ruahmanna a siam a. May 7, 2025 khan Pakistan-in an awp chin Kashmir leh Pakistan-a Punjab-a firfiakte inkulhna hmun chu thlawhna hmangin a bei thut a, UN-in firfiak pawl tia kutzungtanga a kawh ngam, LeT, Jaish-e-Mohammed leh Hizbul Mujahideen (HuM) te hmunhma beiin mi firfiak 100 chuang a that a ni.

Thlawhna hmanga Indian Air Force an chet laiin lei lamah 4 PARA Special Forces an lo che a, commando team eng emaw zah zingah Mizo tlangval hoa che chhuakte pawh an tel a, ramri hrula hel, firfiaka che thinte buzawl an lo luhchhuah a ni.

Captain Lalrinawma leh a hote hian hel tawmna hmun chu huaisen taka beiin a awm zawng zawng an tihlum vek a, India sipai thi an awm lo. 

Captain Lalrinawma Sailo hi a huaisen em avang hian India sipai huaisen chawimawina sang, Kirti Chakra dawng tura thlan a ni a. Hetiang chawimawina hi Mizo zinga dawng thei pahnihna niin kum 1968 khan Subedar Chalhnuna Lushai, Assam Rifles hnenah hlan a lo ni tawh a. Officer zingah erawh chuan dawng thei hmasa ber a ni.

Sipai huaisen chawimawina hi June 8, 2026 khan President Droupadi Murmu-i’n a hlan a ni.

Kirti Chakra hi indo loh laia sipai huaisen chawimawina sang ber dawttu nia thudawn a ni a. Mizoram sawrkar chuan sipai huaisen lawmman dawngtu hnenah hian lawmpuina Rs. nuai 10 a pe bawk a ni.