Aizawl: September ni 5, Teachers’ Day chu zirtirtu pawimawhzia hrereng a, an phu ang ngeia zahna leh chawimawina hlan nise tiin School Education Minister H.Rohluna hova State Working Committee thu-khawm chuan a rel a. SWC thurel bawhzui hian Aizawl DC hova meeting chuan kumin zirtirtute ni chu VC te kaihhruainain a huhova ropui taka lawm tum nise an ti.   Nikum 2017 khan zirtirtu chhawmdawl ngaite puihna ‘Teachers Welfare Fund’ atan hian Rs. 12,67,058 hmuh a ni a, sum hmuh hi district hrang hranga zirtirtu awm zat atanga chhut chuan beisei aiin a tlem a, sum hi sawrkar leh private school zirtirtuten an thawhkhawm a ni. Kuminah pawh hian Teachers Welfare Fund atan hian zirtirtu zawng zawngte chuan Rs. 50 thawh leh theuh se tia rel a ni a, zirlaite pawh mahni remchan ang ang thawh tura beisei nise tih a ni bawk a. Teachers’ Day puala thawhlawm te hi SDEO ten DEO kaltlangin Directorate ah thehluh vek tur a ni.   Thudawn danin kum 2017-2018 chhungin zirtirtu 68 hnenah Teachers Welfare Fund atangin chhawmdawlna Rs. 5,66,000 pekchhuah a ni a. Kum hmasa lam aiin zirtirtu chhawmdawlna pekchhuah hi a tlem zawk a, a tlem zawk chhan hi NFTW awmzia hrefiah tawk lo an awm vang nia thudawn a niin uar zawka puanzar nise tia rel a ni bawk.   Teachers’ Day hmannaah hian khawtlang hruaitu leh tlawmngai pawl hruaitute chu a theih chin chinah sawm nise, chubakah zirtirtu chawimawina lo dawng tawh te sawm nise tia rel a ni bawk a. Aizawl khawpui ah chuan hmun remchang laia School Education department in zirtirtute chawimawina thuziak an tar thin bakah kumin hian Aizawl DC office chuan thuziak (banner) pahnih an tar belh dawn a ni.   Teachers’ Day lawm dan tur chungchang ngaihtuah tur hian state pum huapin School Education chairmna na hnuaiah State Working Committee din a ni a, hemi hnuaiah hian district tinah DC (Deputy Commissioner) chairman na hnuaiah District Level Committee din leh a ni.