Hmanlai pi leh pu atangin purun zung hi kan ei nasa hle a. A par hi kan leh bai a, tlakah te an hmang a, a hnah hi bawl leh kan a, chutiang bawkin a zung hi kan, bawl leh thil dangin an siam thin a. Mizo chawhmeh lar tak mai hi Mizoram khawchhak lama awm, Teikhang khua chuan an ching nasain an hmingthanpui hle.

ZALEN-in a biaknaah Teikhang Village Council President Chhuanvawra chuan an khua chuan purun hi an ching nasa hle tih sawiin kuminah pawh in 250 chuangin an ching a. Tlangram lo neiha buh chin ai chuan a hlawk zawk avangin khawtlang pawhin chin chhunzawm zel an tum niin a sawi.

Teikhang ram chu purunin a ngeih nia sawiin Teikhang VCP chuan, “Teikhang ram hi purun hian a ngeih hle a, a tha duhin kan eibel ber a ni a. Tunlai hian kan ching tan leh mek a, heti chung hian kan hralh reng bawk a ni,” a ti.

April thla chu purun chin tan hun a ni tih sawiin June thla velah a par a, chu chu an zuar a. A hnah pawh eng emaw zat hralhin bai leh sawhbawlah te an hmang a, a zung erawh chu July thla tawp vel atangin an cho tan thin niin a sawi bawk.

VCP Chhuanvawra chuan purun chu kar tin Aizawlah pick up trip thum vel an phur thla thin tih sawiin kg-ah Rs. 50-in an hralh thin niin a sawi a. Purun leitute chuan a baa lain an hralh zawhah a man chu an pe leh mai thin a ti a. Purun chu Manipur lamah pawh eng emaw zat chu an hralh thin niin a sawi bawk.

Teikhang VCP chuan purun hralhna kawngah sawrkarin hmalakpui thei se a duh hle tih sawi bawkin, “Horticulture leh agriculture department lamah pawh kan thlen thin a; mahse, vawiin ni thlengin min la buaipui thei lo a. Sawrkar hian market lam hi min buaipui thei se chuan tun ai hian kan ziaawmin kan beisei a ni,” a ti bawk. 

Teikhang khua hi alu leh ground apple pawhin a ngeih hle nia thudawn a ni.