Tomato tih hi saptawng a niin Mizo tawng chuan Sap bawkbawn tih a ni a; mahse, tomato tih hi Mizo tawng ang maiin kan hmang lar ta a ni.

Kum engtik atangin nge Mizoten kan chin tan hriat a ni chiah lo a, tun hnai hun engemaw thleng khan phai lama an thar chu kan ei ber a ni a. Mahse, tun hnai atang khan Mizoram chhungah eng emaw zat thar a ni ve tain khawchhak lama awm, Tualte khua chuan tomato hi an hmingthanpui hle.

Tualte khua hi in 250 vel niin heng zinga chhungkua 223 chuan tomato hi an ching mek a. Hriat theih chinah tomato atang hian Rs. 9,90,02,000 an lei chhuak tawh a, tomato hringa hralh mai lovin ‘Ketchup’ an siam tan mek.

Tualte tomato chingtute hian society dinin kum 2019 atang khan hma an la tan a, a tirah chuan member 20 chauh niin an pung zel a, tunah chuan member 223 an awm tawh a ni.

Society member atan hian tomato kung 1,000 nei chinte pawm an ni a, hei hi a chhan chu hlawk tum lova eng emaw ti mai mai thinte venna atan niin society hruaitute chuan an sawi.

Tualte Tomato Growers Society Chairman R.Lalchhanchhuaha chuan society hnuaiah committee peng hrang hrang siamin lungrual takin hma an la ho thin niin a sawi a. Tomato thar vanglai chuan a hralhna lamah harsatna an tawk thin tih sawi bawkin tlawm deuh mah se hralh hrim hrim an duh vangin an tiral tho niin a sawi.

Tualte khuaah hian kum khatah vawi hnih tomato hi chin thin a ni a, a hmasa zawk hi February leh March inkarah a chi kuiin July leh August thlaah an seng fel hman a. A vawi hnihna hi July-August-ah kui lehin December-January thlengin an seng thin a ni.

Tualte-ah hian a tlangpuiin mi pakhatin tomato kung 2,000-3,000 an phun thin a, hei hi tin chanve hmun aia zim hret a niin quintal 60 atanga 80 an thar tlangpui a, kung khatah kgs thum atanga nga inkar thar ang vel an ni a. An tomato chinte hi Arka samrat leh Arka abhed variety an ni.

Tomato hi thlai hrisel leh tui tak, Mizote pawhin kan ei nasat a ni a. Vitamin A, B leh C bakah iron leh phosphorous tam tak a pai a, hei mai bakah tomato-a senna petu, lycopene hi anti-oxidant tha tak mai, cancer natna laka min vengtu pawimawh tak a ni bawk.