Mizoram hi tlangram a ni a, ram dangte angin lui lian a awm ve lem lo a. Kan luite pawh khawi emaw tuikhur leh sih vel atanga hnar nei an ni hlawm a. Industry leh factory liante a awm ve lem lo bawk nen, kan lui tuite an thianghlim thin hle a, lui tui fim kak mai inte chu damlo leh ram pawna Mizo awmte thlakhlelh a ni thin. Mahse tunah erawh chuan a mi chengten kan ram kan suasam nasat avangin kan lui tuite pawh a bawlhhlawh tial tial a. Eng emaw chang phei chuan mihring tana hlauhawm khawpin a bawlhhlawh ta hial mai.

Khawvel ram changkang zawkte chuan ramngaw leh a mawinate humhalhin tihchereu an phal lo a. Khuarel mawina chu a nihna ang angin an lanchhuahtir thin a, hei hian khualzinte a hip a, sum lakluhna tha takah an chantir thin.

Chutih lai chuan Mizoramah erawh kan thing leh mau, nungcha leh savate kan humhalh loh avangin ni tin an chereu mek a. Hei hian kawng hrang hrangin harsatna a thlen a, sik leh sa mumal lo, tui lian leh thil dang tam tak tun hma lama hriat ngai loh kan hre chho ta fo mai.

Chu mai ni lovin thing leh mau kan tihchereu nasat avangin ruahtui tifimtu an awm lo va, kan lui tuite a nu-in a bawlhhlawh nasa hle.

Tui in tur thianghlim kan neih theihna atana hma latu, Public Health Engineering Department chuan tun hnaia ruahsur-ah khan Aizawl khawpui tui in tur lakna Tlawng chu a nu nasa hle a, hriat theih chinah a bawlhhlawh nasat ber tum niin an sawi.

PHE Engineer pakhat chuan, “Kan hriat theih chinah Tlawng tui nut nasat ber hi tui nut zawng tehna, nephelometric turbidity units ‘NTU’-ah 363 a ni a; mahse, tun hnaia Tlawng nut zawng hi NTU 900 vel a ni a. Mihringte in tura siam tur chuan a ngaihna a awm lo a ni,” a ti.

PHE Engineer-te chuan mihring in tura tui an pump dawn reng rengin a nu lutuk chu thlitfim a buaithlak thin niin an sawi a. “Kan thlitfimna filter-a lut tur hian 10 NTU aiin a san loh a ngai a, 5 NTU chin hi a himah kan ngai a ni,” an ti a. Tun hnaia Tlawng lui lianah khan bawlhhlawh mai bakah oil chhia pawh eng emaw zat a awm niin an sawi bawk.

Heti taka Tlawng a nut chhan hi a fintu lui leh kawrah leivung leh bawlhhlawh kan paih nasat vang niin PHE lam chuan an sawi a. Hei mai bakah mihringten ramngaw kan tihchereu nasat avangin lei keng nghettu thing an awm lo va, chu chuan leimin a thlen bakah lei chunglang kal ral tur vengtu a awm lo niin an sawi bawk.