Khua a thal a, tui harsatna in Mizoram pum a tuam chho leh mek. Thingtlang khaw tam takah tuikang nghak hmuh tur an awm a, Aizawl khawpui ah pawh tui a harsa leh ta hle.

PHE thawktute chuan tunlaia Aizawl khawpui tui harsat chhan ber chu February thlaa pui pump na khawl pakhat chhiat vang a ni tih ZALEN an hrilh a. "February ni 18,2022 khan ni khata tui litre maktaduai 12 (12 mld) pump thei electric khawl lian chu a chhia a, he khawl chhia hi ni 4.3.2022 khan siamthat a ni a. Khawl chhia hian nasa takin min nghawng a, a pangngaia sem leh tur chuan hun engemaw chen a ngai thin a. Tunkar chho ah hi chuan dan pangngaia sem leh theih kan beisei a ni," an ti. PHE thawktute chuan Aizawl khawpui chu tui hnianghnara pe tur chuan ni khatah tui litre maktaduai 32 pump a ngai tih sawiin tun dinhmunah erawh ni khatah tui litre maktaduai 28 chauh an pump thei niin an sawi a. "Khua a lum chho a, tuihna a kang bakah mipuiah tui mamawhna a sang bawk si a, chuvangin duhthusama hnianghnarin tui kan sem thei lo a ni," an ti bawk. PHE tui pipe hi a hlui tawh avangin a semchhuahna kawngah tui bothlau (distribution loss) a tam hle a, tui bothlau hi 28% a tling niin department thawktute chuan ZALEN an hrilh bawk.

Mithiam pakhat chuan Aizawl chawmtu Tlawng lui tui chu a kam/tlem hret hret niin a sawi bawk a. "Khawvel changkang zelah ram kan ti chereu nasa a, hei hian tuihna a tikang nasa em em mai a. Tuna SIPMIU in Setlak lui atanga tui pump an tum mek hi an zawh hma chuan Aizawl khawpui hi tui kan la harsa zel dawn niin a lang," a ti bawk.

Motor hmanga tui phur thin pakhat chuan order an hmu tam thin hle niin ZALEN a hrilh a. "Tunlai chu order kan ngah thei khawp mai a, mipuite mamawh hi kan pe seng lo zawk a ni. Khua a thal chho a, kan tui chawina thin ah tui a tlem ve zel nen indaih loh a na duh khawp mai," a ti ve bawk.

Pa pakhat chuan lirthei hmanga tui phurh chu a thianghlim leh thianghlim loh enfiah thei se a duh tih sawiin, "Mipui ten tui kan lei lo thei lo a, kan tui lei te hi a thianghlim tawk em tih leh khawia mi nge tih hi sawrkar hian enfiah thei se ka duh hle a ni," a ti ve bawk.