Mizoramin kût chi hrang hrang kan hman thin te a huhoa hman dan a awm em tih zirchiang tura din Study group on clubbing together on various festival in Mizoram chuan Mizoramin kût a hman thin zinga mi Anthurium festival chu hmang zui tawh lovin uar zawka Chapchar Kût hman an rel. Study group chuan Chapchar kut atan hian tun aia tam deuh sum sawrkarin ruahman tawh se, a theih chuan nuai 100 tal dah tawh se an ti a. Chapchar kut ah hian sum a lo tam tham deuh chuan zau zawk leh ropui zawka hman theih an beisei a ni. Sawrkar laipui chuan kumtin kut chi hnih hmanna atan nuai 50 chu Tourism department a rawn pe thin a. He sum hmang hian Tourism department chuan Anthurium festival leh Thalfavang kut te an hmang thin a, anthurium festival hi tihtawp a nih chuan hemi atan a sum lokal chu Chapchar Kût hmanna sensoah a hman theih dawn a ni. Anthurium festival tihtawp hian engnge nghawng a neih ang tih la hriat chiahloh mahse Mizoram in state dang leh khawvel ram dang thleng pawha kan pangpar thawnchhuah chingtu Anthurium growers te an hnual mai thei a. Chubakah thalai tam tak, intihhlimna neih chak te, zaithiam leh festival avanga sum tam tak lo laluttu te a nghawng ngeiin a rinawm. Hemi chungchangah hian Tourism department lam chuan Anthurium festival hmanna thin Reiek hmunhma chuan a zawh tawh loh avangin a buaithlak thin hle niin an sawi a. Thalaite intihhlimna tur chuan kumtawp lamah NEZCC puihna in Music festival huaihawt thin an tum niin an sawi. Tourism department hian hun engemaw chen atang khan Thalfavang Kût chu sawrkar laipui sum an hmuh atangin Tuirial airfield-ah an lo hmang tawh thin a, zai thiam leh lam thiam bakah intihhlimna chi hrang hrang nen neih thin a niin hei erawh la neih chhunzawm zel tur a ni thung. Thalfavang kut han tih hi a hming a sei deuh avangin lam a buaithlak deuh a, Favang kut emaw Pawl kut emaw tia thlak a tha em tiin Tourism department chuan ngaihtuahna an seng mek. Kut chi hrang hrang zirchiang tura din ‘Study group on clubbing together on various festival in Mizoram’-ah hian Art & Culture, Tourism, I&PR Department te bakah Central YMA, MJA, MUP leh MHIP hruaitute an tel a ni.