Archaeological Survey of India (ASI)-in archaeological site atana an vuah tak kum 2400-a upa Vangchhia chu UNESCO (United Nations Educational, Scientific and Cultural Organization) World Heritage atan a beiseiawm niin sawi a awm leh ta. Vangchhia hi Mizoram in ASI pawm ‘archaeological site’ kan neih chhun a ni a. He hmunah hian thil tam tak zir thar tur a awm thu mi thiamten an sawi a, mi thiamten zirchiang ta se Mizo history a sawi danglam dawrh thei ang em tih chu zawhna lian tak a tling a ni. P. Rohmingthanga, Indian Trust for Art & Cultural Heritage, Mizoram chapter-a convener chuan he hmun hian UNESCO World Heritage site-a pawm a nih theih nan tlinna leh hlutna a nei niin a sawi a. “Kum 1970 chho khan he hmun hi a danglam a ni tih chu helicopter atangin ka zu hmu tawh a ni,” a ti. “Myanmar leh Chittagong Hill Tracts lam te thlengin a huam avangin Mizoram history a tihdanglam ngei ka ring,” tiin a sawi bawk. Vangchhia hi Champhai district chhunga awm niin in 153 awmna khua a ni a. He khuaa lungphun leh thil dang dang thilhlui zirmiten an hmuh chu zirchian a, chhui zui fe tham a nih tak avangin mi thiamten an ngai pawimawh a, ASI-in archaeological site-ah an puang ta hial a ni. He hmunah hian mihring siam lim tam tak bakah thlan hlui tawh takte hmuhchhuah belh a ni zel bawk a ni. Kum BC 600-na hunlaia thil hlui nia radio carbon dating hmanga chhut chhuahte hmuh a ni a. ASI headquarters New Delhi-a Assistant Superintending Archaeologist Sujeet Nayan chuan, “Vangchhia chu khaw hlui lian tak a nih ngei thu an sawi a, tam tak zir belh tur a la awm a, a zau zawng hi Bangladesh leh Myanmar pawh a thleng a ni,” tiin a sawi. Km 40 bial vela zau a nih thu sawiin ASI mi thiamte chuan hemi chhung hi ngaw chhah takin a khuh a, lung bang te, tui dahkhawlna te, puk banga mihring kerna hnuhma awm te leh thil dang tam tak a awm niin an sawi bawk. P.Rohmingthanga chuan UNESCO World Heritage Site atana thlan a nih theih nan Vangchhia chu buatsaih mek a nih thu leh hma lak mek a nih thu a sawi bawk. ASI-in Vangchhia-ah Hindu sakhaw sulhnu an hmuh thu an sawi tih MZP chuan an lo auchhuahpui tawh a, Hindu sakhaw hmun hlui anga chhuah an tum chuan ASI an lo luh an phal tawh dawn loh thu an sawi tawh bawk.