Mizopa tlawmngai leh huaisen, hming dai ngai tawh lo tur leh Aizawla kan hall neih ropui ber hming putu Vanapa thlan humhalh leh enkawl hna chu Hnahlan khawtlang chuan an thawk mek a, thawh chhunzawm zel an tum. Hnahlan Branch YMA chuan Vanapa thlan Sub Committee dinin he mite hmalakna hnuaiah hian Hnahlan ram, Tuithoh kama awm Vanapa thlan humhalh leh a panna kawng sial hna chu tunlai hian an thawk mek. Kawng sialna atan hian BADP sum, Agriculture department sum pek bakah khawtlang mipuiin ni 100 inhlawhna atanga ni 2 theuh an hlawh thawhkhawm hmangin kawng laih a ni a, mahse hna thawh tur a la tam deuh avangin ni 100 inhlawhna atangin ni 1 theuh hna thawh man hi mipui hnenah la dil leh an tum niin Vanapa thlan Sub Committee chairman Lalrotluanga chuan Zalen a hrilh. Vanapa thlan hi kawngpui (Champhai-Hnahlan road) atangin km 2 chuang hret a ni. Vanapa thlah zinga la dam zinga mi (Vanapa tuchhuan), C.Thasiama, Bawngkawn chuan an pi leh pu atanga thurochhiah an inhlawnchhawn danah an pu Vanapa chu Hnahlan ram, Tuithoh lui kamah phum a ni tih chu an pawm dan a ni tih a sawi a. “Kan pu Vanapa thlan chu Tuithoh luikam ami ngei hi a ni a, hei lo hi chu hmun dangah keini chhung hi chuan kan hre lo. Miin hmun dangah a awm pawh ti se kan pawm lova. Chuvangin, hmun dangah Vanapa thlan a awm tih hi tumahin sawi tawh lo turin ka ngen a ni,” tiin a sawi bawk. Vanapa chanchin chhuitu zinga pakhat C.Lalaudinga chuan mi hrang hrangte a kawm kual hnuah Vanapa chu Hnahlan ram, Tuithoh lui kamah ngei phum a ni tih a sawi a. Mi hrang hrang te thusawi bakah April 1926 a Mizo leh Vai chanchinbuah Chalkhuma chuan, “Vanapa chu Saithuama (Hnahlan leh Diltlang lal) ramah putar takin kum 1870 vel khan a thi,” tiin a ziak a. Hei bakah hian ni 20.10.2004 khan Art & Culture Department mi tirhte leh Hnahlan Branch YMA chuan Vanapa thlan hi phawrhin Vanapa awm zawn lei kawrawng, a lu zawn lei kawrawng, a samzai mawih leh thildang engemaw zat an laichhuak a. An thil hmuh leh phawrh hian mihring phumna hnu ngei a ni tih a lantir niin Zalen a hrilh bawk. Mizote hi kan hnam la naupan vang nge thil kan chhinchhiah tha lo hle mai a. Vanapa thlan chungchangah pawh inhnialna a tamin thenkhat chuan Rabung rama Zawlnghak hmunah Vanapa hi phum niin an sawi ve thung. Vanapa thlan/phumna mai ni lovin Lalnu Ropuiliani phumna chungchangah Ralvawng leh Denlung khua ten thu inchuh an nei mek a, Fiara tui awmna chungchangah pawh Farkawn leh Vaphai ten thu inchuh an nei bawk a. Chutiang zelin hmun hlui tam tak awmna chungchangah inhnialna a awm mek a, mithiamte an penchhuah a, tihchian a nih vat loh chuan thangthar leh zirmi ten harsatna an la tawk chho reng dawn niin a lang.