Ni tin lirthei a pung zel a, kawng lah tihzauh hleih theih a ni si lo bawk nen ni tin a chep zual zel a, a chang phei chuan lirthei a kal ai chuan kea kal a sawt zawk ta hial mai. Kawng chep hle mah se tulna avangin lirthei hman a ngai tho si a, heng hunah hian mi mal lirthei keng lovin public transport hrang hrang hi hman uar ni ta se traffic jam hi a ziaawm deuh lo’ng maw? Sawrkar chhinchhiah danin Aizawl khawpuiah hian Taxi hi 3500 chuang awm anga ngaih a ni a, Two wheeler taxi hi 500 vel leh Aizawl daifem vela service auto rickshaw hi 50 vel awm anga chhut a ni. Mi thiamte chuan Aizawlah hian taxi hi 700 vel awm se tawk vel tur leh taxi-te pawh hlawk turin an chhut a; mahse, a let 5-a tam a awm chungin mipui lam chuan harsatna kan tawk awl lo thung. STA-in rate a bithliah ang chuan taxi hi a tlanchhuah tirh km 1-ah Rs. 40 niin a bak chu km khat zelah Rs. 30 tur a ni a; mahse, rate hi zawm a hlawh lutuk loh bakah tlan duh lohna an la nei ta zel a. Chutiang bawkin two wheeler taxi pawh sawrkar rate an zawm tha bawk si lo a, mipuite kan phun lungawi vel ta mai niin niin a lang. City bus-ah pawh conductor thenkhat, a nawi kir lo ta mai mai pawh an awm bawk. State Transport Authority-in public transport rate a siam aia toa tlan thin an awm nia sawi chungchangah Transport department thawktute chuan mipuite chu phun lungawi mai lova thil dik lo titute chu lirthei number leh an chuan man pek zat nen chiang takin hrilh thin se an duh tih an sawi a. Thil dik lo ti an awm chuan an hrem thin a; mahse, report chiang a awm loh chuan an tan pawh hmalak a har thin nia sawiin public transport-te chuan tlan duh lohna an nei thiang lo niin Zalen palai an hrilh bawk. Pa pakhat chuan Taxi-pute chu tun aiin hawihhawm lehzual se a duh tih sawiin state dang atanga lo kalte laka Mizoram hmai tibaltu an nih theih avangin hawihhawmna kawngah pawh tun aiin tan la lehzual se a duh tih a sawi a. Taxi thenkhat, passenger chuang hmasa zawkte hmaizahna nei lem loa passenger la zung zung mai an awm thin chu tha lo hle a hriat thu a sawi a. Rate chungchangah pawh inang lo a awm thin chu mak a tih thu a sawi bawk. Hetih lai hian tun hnaia Aizawla inbun thar, ‘Ola Taxi service’ chu a rate a tlawm avang leh a him nia sawi a nih avangin mipui lam chuan an bawr tan viau niin an sawi a. Tun dinhmunah Ola hian Aizawlah taxi 200 vel service-tirin an rate hi km khatah Rs. 30 aiin a tlawm nia thu dawn a ni. &&&&