India ram rorelna in sang, Lok Sabha leh state assembly-a hmeichhiate tana seat hmun thuma thena hmun khat hauhna tur, Women’s Reservation Bill, 2023 (Nārī Śakti Vandan Adhiniyam) chu Lok Sabha-ah pass theih a nih tak loh avangin hman theih a ni dawn ta lo. 

Bill hi April 16 & 17, 2026 khan sawiho a ni a, rorel lai, BJP leh a thurualpuite chuan pass a nih ngei theih nan theihtawp an chhuah a. Session-ah hian rorel lai BJP chuan an MP-te chu tel vek turin an hriattir a. Sawihonaah hian rorel lai leh eptute chu nasa takin an inhnial a, ni hnih chhung sawiho a nih hnuah vote lak a ni a, a tlang zo ta lo a ni.

Women’s Reservation Bill hi Lok Sabha-a tlang tur hian member hmun thuma then hmun hnihin an thlawp a ngai a, a thlawp zawng hian member 298-in an vote a, 230-in a thlawp lo zawngin an vote a. Danin a phut hmun thuma thena hmun hnih thlawptu a neih theih tak loh avangin a tlang zo ta lo a ni.

Women’s Reservation Bill ruala pass tura put luh tum bill dang pahnih, Lok Sabha ramri siam felna tur (delimitation) leh Lok Sabha seat tihpunna turte chu bill hmasa a tlang loh avangin vote tura chhawp chhuah a ni ta lo a, sawrkar laipui chuan women reservation nena inkungkaihna nei niin a tarlang.

Women’s Reservation Bill hi pass ni ta se chuan Lok Sabha leh state assembly-ah te hmeichhiate tan seat 33% hauhsak an ni ang a, an seat tur erawh inthlan dawnah pawh chawp tur a ni a. Inthlan vawi thum a zawna neihah hman tur niin hei hi a zawh hunah chuan a tharin a tir atanga pawh leh zel tur a ni ang. 

Kum 1987 khan khatih laia prime minister, Rajiv Gandhi chuan khatih laia Union Minister Margaret Alva kaihhruai member 14 awmna committee dinin hmeichhiate chawikan an nih theihna atan rawtna siam turin a ti a. Gandhi-a hian thingtlang leh khawpuia rorelnaah hmeichhiaten seat hmun thuma thena hmun khat an chan theihna turin ruahmanna a siam a, Lok Sabha-ah pass a ni nain Rajya Sabha-ah erawh a tlang zo ta lo a ni.

Kum 1992-a Prime Minister PV Narasimha Rao-a’n thuneihna a chan khan thar thawh leh a ni a. Women’s reservation bill a taka pu luttu chu HD Deve Gowda kaihhruai sawrkar kha niin September 12,1996 khan Lok Sabha-ah pharh a ni a, parliament-a joint committee zirchian atan dah ni mah se sawrkar a tlak tak avangin awmzia a nei ta lo a ni.

September 19, 2023 khan Narendra Modi kaihhruai sawrkar chuan a thar thawh leh a, a tlang zo lo leh ta a ni. 

Lok Sabha-a Women’s Reservation Bill a tlang zo lo chu pawi an tih thu BJP chuan an sawi a, he bill hi rorelna in sangah a tlang ngei a nih theih nan hmalak zel an tum tih BJP thupuangtu, Shazia Ilmi chuan ZALEN zawhna chhangin a sawi a. 

Zirtawpni tlaia Aizawl Press Club-a chanchinbu mite a kawmnaah BJP thupuangtu chuan Congress leh eptu party dang­ten bill an pass-pui duh lo hian hmeichhiate an ngaih pawimawh loh­zia leh chawikan an tum lohzia a lantir niin a sawi a. Eptu party-te chu hmeichhiate hamthatna chan ve tur dodalah a puh bawk.

Women’s Reservation Bill-ah hian a thlawp zawng leh thlawp lo zawngin ngaih­dan a insual nasa hle a. Mi tam takin tha an tih laiin tha lo ti pawh eng emaw zat an awm bawk.

He bill hi pa pakhat chuan tha a tih lem loh thu ZALEN a hrilh a. “Mizoram chuan mipa leh hmeichhia inthliarna a awm lo a, hmeichhia pawh nise an fel phawt chuan MLA-ah pawh an dintir mai a. Chumi a chianna em em chu tun assembly kal laiah pawh hmeichhe MLA leh minister kan nei a, candidate-ah pawh hmeichhe tam tak an ding bawk a; chuvangin, an tana hauh kher hi a tulna ka hre lem lo a ni. 

Village council, local council leh municipality-a hmeichhiate tan seat hauh pawh hi kawng tam takin a buaithlakin ka hria a, MLA leh MP ah hi chuan hauh sak kher hi a tul ber lem lovin ka hria a ni,"”a ti a. Tuna Women’s Reservation Bill chu hmeichhiaten dinhmun tha an chan ve lohna hmuna hman atan erawh chuan tha a tih thu a sawi thung.