India ram hmun dang leh khawvel ram changkang zawkah chuan dawr hi zan rei tak tak thlengin an hawng a, India ram chhungah ngei pawh phai lama zin chuan khaw thim hnuah bazarah kal a ni chauh thin.

Hetih lai hian Mizoramah erawh chuan khaw ên lai deuh chauhin dawr kan hawng thung a; mahse, tun hnai hun eng emaw chen atang khan zan rei tak tak thlenga dawr hawng an awm ve ta a, hei hian mipui mamawh lamna kawngah nasa takin awlsamna a thlen a ni.

Aizawlah pawh zan rei tak tak thlenga dawr hawng an awm a. Hei mai bakah kawng kama ei tur zuar pawh eng emaw zat an awm bawk. Heng ei tur zuarte an hralh tha thei hle a, hah deuh thin mah se eizawnna tha tak a nih avangin an hlawkpui niin an sawi.

Zan lama ei tur lam thin nula pakhat chuan, “Zan mut theih lohte hi ka nei thin a, in lama ei tur siam ai chuan hetia zan rei deuh thleng pawha ei tur zuar an awm hi chuan pan mai hi ka duh thin a. Ka tan pawh thil han siam leh ai chuan a awlsam zawk a, in zuar reng se ka duh hle a ni,” a ti.

Lirthei khalha ei zawng Puia pawhin, “Keini driver-ho hi chuan a changin tlai tak taka in thlen changte kan nei a. In lama ei tur han siam leh vel ai chuan hetia lam mai tur a awm hi tha ka ti a; mahse, chutih rual chuan duh aiin to ka ti deuh a. A that viau rualin hei ai hian titlawm thei se ka duh hle a ni,” tiin Zalen a hrilh.

Aizawl khawpui dai, motor innghahkhawmna thin bula dawr te siam nu pakhat chuan ZALEN zawhna chhangin dawr te siam chu an hlawkpuiin an chhungkaw ei bel ber a ni tih a sawi a. "Ka fate hian zan lamah dawr hi an nghak a, keiin chhun lamah ka ngahk ve thung a. Kan dawrah hian ei tur nepnawi bakah thingpui leh a hmeh hi kan kawl ve a. Zan khua mai hian lirthei veivak hi an awm ve reng a, dawr kan nghah peih phawt hi chuan inhralhna tur hi nileng zankhua mai hian a awm a ni," a ti a. Zin veivak zingah ei tur baka an lei nasat chu kuhva leh sikret (cigratte) a ni tih a sawi bawk.

Tunhnai hun engemaw kalta atang khan digital India hmalakna in pawisa tel lova indawrna 'cashless transaction' chu kalpui a niin Mizorama dawr hrang hrang te pawhin an hmang tangkai chho hle a. Kawng kama inzuar (hawkers) te pawhin hei hi hmang tangkaiin QR Code hmangin an inhralh nasa hle.