Kohhran in an do a, rawngbawltute chu zu leh a kaihhnawiha fihlim lo an awm chuan an chanvo hlihsak hial tura tih an ni a. Heti chung hian Zu dawr a lun tulh tulh a, zu lei theihna permit siam an thahnem chho zel bawk. Zalen palai chu zu khap hliha zawrh a nih hnuah mipui ngaihdan la turin a kal kual a, ngaihdan haichhuah a ni nual. Siam ve law law ila Mizoram sorkar hian Zu factory siam mai se tih chu Millennium Centre-a wine shop bul vela awm te titi tui ber niin, zu avanga sum hmuh te chu Mizoram mipuiin tel ve thei se tia duhthusam an awm bawk. Wine Shop-a zu lei tum in tlar te chuan, zu tha lei tur a awm chu lawmawm an tih thu an sawi a. Zu lei tura hun rei tak in tlar ngai chu a ruka lei tum ai chuan an thlan zawk thu an sawi hlawm. Zu dawr bula dawr nei nu pakhat chuan 'Mizo te hian zu hi kan lo duh hle a nih dawn hi, wine shop bula dawr nei kan nia zu zawrh tan ni atang khan an in tlar put reng mai' a ti a. Sorkar chuan zu factory hi siam se a duh thu sawiin, 'Mizo local zu te hi sorkar hian thianghlim takin siam se mirethei zawk pawhin an chhawr theih ka ring a ni' a ti. Wine Shop-ah hian patling, thalai kum naupang lam permit nei pha chin leh hmeichhia te tiamin nilengin an intlar hmuh tur an awm reng a, sorkar phalna thlapa lei theih a nih takah chuan zu lei tura intlar chu zahthlak ah an ngai tawh lo hlawm a ni. Wine Shop kawta zu lei tum tlangval pakhat chuan,'Manipur zu tha 'sekmai' ang hian kan local zu hi siam ve se chuan Whisk-y in thin ho hi chuan local zu tha chu kan thlan zawk ka ring,' a ti a. Local zu tha hmuh tur a awm loh avanga sap zu lei mai thin chauh a nih thu a sawi. Zalen palai in Wine Shop-a zu lei tum in tlar a kawm kual naah an sawi tam ber chu Mizo zu tha lei theih tura siam theih nise tih a ni a, sap zu ai chuan Mizo buh dawidim thianghlim taka siam ngei chu tui an tih zawk thu an sawi uar hlawm hle. Kan state thenawm Manipur-ah chuan an tualto zu 'sekmai' chu thianghlim taka siamin saidawiumah dahin 'Made in Manipur' tih chuang kalhin an zuar chhuak thin a, 'sekmai' chu Mizo zu in thinte zingah paw'n ngaihlu an tam. Zu thawnchhuah Sap zu chu pawn atanga lakluh a nih avangin a hlawkna hmun dangah a kal a chu chu ui an tam hle. Mizo local zu chungchangah hian thianghlim taka siam chhuah a, Mizoram chhung mai ni lo ram pawn thlenga thawn chhuaha state in a hlawkna tel ve thei se tiin Zalen in a kawm zingah ngaihdan nei an tam ber a ni. Zu dawr awm belh thei se Dan anga zu lei theih a nih hnu hian zu avanga a hlawkna tel te chu mi tlemte an ni hrih a, wine shop awm belh an duh thu zu lei turte chuan an sawi vek a, tun dinhmun ai hian thlahdul hret sawrkar chuan phal sela an tih bakah Mizo te chuan an zawh an ring bawk a ni. Aizawl hmar lam (hming lan duh lo) pa pakhat chuan, 'Tunah hi chuan lei tur ringawtin hun kan paih nasa a, hun a uihawm a, chuvang chuan 'black' a zuar an la tam em em a. Hmun 2/3 velah zu dawr chu hawn belh nise black a zawrh a tlem anga, sawrkarah revenue chhunluh a tam zawk bakah hun paih a tlem zawk tur thu a sawi bawk.