Aizawl: Supreme Court thupek angin sim card pe chhuak tu company hrang hrangte chuan an sim card hralh chhuah sa te Aadhaar nena thlunzawm hna an thawk mek a. February 6, 2018 hmaa thlunzawm hna zo hman turin thu pek vek an ni. Airtel chuan Aadhaar nena an thlunzawm tawh zat chu sawi mai a la theih rih loh thu leh a chanve an la tih tlin an rin loh thu Zalen an hrilh a. Thingtlang lama awm an tam avangin tihchak a harsat thu Airtel hotute chuan sawiin nakkum February 6-a zo hman turin an theihtawp an chhuah zel niin an sawi bawk. Supreme Court thupek a Aadhaar thlunzawm hna hi thawh a ni a. Aadhaar leh Sim Card thlunzawm a nih chuan mobile phone hmanga mi bum thin mi sualte leh mi sual firfiaka che thinten sim card hman tur an neih loh nana tih niin thudawnna chuan a sawi a. Mipuite nihna chu humhim a ni dawn a, mobile service provider te hial mipuite chanchin kimchang Aadhaar a awm chu an kawl ve dawn lo niin thuneitute chuan an sawi. Telecom Company te hian UIDAI ah an thil lakkhawm te hi a thehlut vek ang a, mipuite Aadhaar-a an mimal thil kimchang lo kawl an awm chuan service provider te hi Aadhaar Act 2016 hmangin kum 3 lung in tan thleng a hrem theih an ni dawn niin thu dawn a ni bawk. Airtel bakah hian service provider hrang hrangte hian Aadhaar nena an sim card thlunzawm hna hi Mizoram chhungah an thawk mek a, mipui an intlar hnem thin hle niin thudawn a ni.