Lionel Messi leh Cristiano Ronaldo te inelna chu Saudi Arabia-ah tihnun thar leh a ni dawn a, February thla hian Inter Miami-in season thar atana inbuatsaihna an kalpui turah Al-Nassr an hmachhawn dawn.

Messi leh Ronaldo inhmachhawn lehna tur hi Riyadh Season Cup a ni dawn a, Miami hian January29-ah Al-Hilal an tum bawk ang.

November thlaa nomawi inchuh tur puan a nih lai khan Miami hian tel ve tur anga an sawina chu an lo pha tawh a; mahse, an tel dawn tih a chiang leh tawh.

“Heng inkhelh turte hi kan team tan fiahna pawimawh tak a ni dawn,” tiin Miami sporting director Chris Henderson chuan a sawi.

“Theihna nei sang tak, Al-Hilal leh Al-Nassr hmachhawnna hun remchang kan nei thei tur hi kan phur hle a ni,” a ti bawk.

Mi tam takin khawvela ropui ber anga an chhal pahnih, kum 36 mi, Messi leh Ronaldo te hi kum 2008 Champions League semifinal-a Manchester United-in Barcelona an hneh kha an inhmachhawn hmasak ber niin a hnuah vawi 34 an inhmachhawn zui tawh a. Argentine forward hian vawi 16 hnehna a chan tawh laiin Portuguese hian vawi 10 hnehna a chang tawh thung a, vawi kua an inhnehtawk tawh.

Vawi 35 an inhmachhawn tawhah hian Messi-a’n goal 21 thunin a thiante thun tur vawi 12 a siamsak tawh a. Kum 38 mi, Ronaldo hian goal 20 thunin goal khat dang a thawk chhuak tawh bawk.

Miami hi season liam taah MLS Eastern Conference-ah 14-na niin July thlaa an lak luh, Messi-a hovin Leagues Cup-ah an champion a, khelh sarih a khelhsak hmanah goal 10 thunin an nomawi hmasa ber a lakpui.

Saudi Arabia hian kum tam vak lo liam ta atang khan infiamna lamah sum tam tak an vawm a, a bikin football-ah an vawm nasa zual a. Ronaldo bakah Karim Benzema, Sadio Mane, N’Golo Kante, Jordan Henderson leh player langsar tam tak an la lut tawh.

Mi thenkhat chuan hetianga infiamnaa sum an seng vak vak hi an rama mihring dikna chanvo palzut nasat sawi awm thin chu hliah nan an ti niin an ngai a. Kum 2018-a chanchinbu mi, Jamal Khasoggi thah te, Yemen indonaa an chết dan te chuẩn sawi a hlawh thin a. Infiamnaa an kal ta vak hi ‘infiamna hmanga insuk faina’ (sportwashing) tia sawi pawh an awm thin a; mahse, Sports Minister Prince Abdulaziz bin Turki Al Faisal chuan an sawina ang hi ‘thil awm mang lo’ a nih thu a sawi thung.