Aizawl June 10, 2024 : Zotrek Adventure Club chuan vawiin khan an Club Office thar hawnna leh an Rising Day vawi 12 na an lawm a, he hunah hian feet 2225 a thuk Tuilutpui puk, Nentianga mipa leh hmeichhia-a lutchhuak naupang ber te lawmpuina an hlan bawk.

Zotrek office thar hi David Zohmangaiha, Everester building Republic Vengah hawn a ni a. Office hawn leh rising day hmanna hunah hian Zotrek member zingah mi Lallawmzuala Pachuau, Thingsulthliah leh Cecilia Lalzampuii, Tanhril te hnenah mizoram puk thuk ber Tuilutpui puk (2225 ft), Ngentiang lutchhuak naupang ber an nih lawmpuina an hlan bawk. Lallawmzuala Pachuau hi puk a luhchhuah lai hian kum 7 leh thla 10 mi niin, Cecilia hi kum 12 leh thla 9 mi niin Hmeichhia a lutchhuak naupang ber a ni.

Zotrek Adventure Club hi mizoram open adventure club lian ber niin member 150 vel an ni mek a, thalai leh adventure lam a tuimi tu tan pawh club hi zawm theih a ni. Mizoram chhung leh state pawn lamah adventure activities an nei thin a, kumin kumtawp lam hian Kanchenjunga Base Camp trekking nei turin an inbuatsaih mek. Zotrek hian adventure activies neih mai bakah environment vawn him lamah te, khuarel chhiatna leh emergency tanpui ngai an awmin theih tawk in an thawkchhuak thin a ni.