Tunhnaiah Mizoram-ah damdawi hmansual theih chi, chak leh hlauhawm tak 'fentanyl' rui an awm nia rinzawn theih turin video a darh chiam a, mi tam tak a ti phawk leka. Social media thenkhatah phei chuan Mizoram-ah lo lut tawh angin sawi a ni a, mi rilru a luah hneh hle.

"Fentanyl hi Mizoram-ah a lo la luh kan hre lo a, END chuan man pawh kan la nei lo a ni. Social Media-a darh vak, ruih nei nia lang, video-a mite kha No 4 ti thin kan hriatchian te an ni a. Heroin hi mihring azirin  thawh dan inanglo thei hle a, damdawi dang nen an pawlh phei chuan mak deuh deuhin an awm thei a ni. Mizorama ruih nana kan la hman tam ber No 4 a ni a, khuh damdawi leh ganja a hluar leh bawk a. Ganja phei chu a pawl (community) ang hial hian an awm a, lifestyle anga hmang an awm bawk a ni," tiin Excise and Narcotic Department hotute chuan ZALEN an hrilh a. Mizoram-a ruihhlo ti zinga 80% chu mipa an nih avangin Mizo mipa an thi nasa a, a hnam ang pawhin vei thar leh tul an tih thu an sawi bawk.

"Fentanyl hi khuh damdawia an ruih ber codeine phosphate leh No 4 ang bawkin opioids tho a ni a. No 4 ai hian a let 50 vela a chak avangin a hlauhawm a, overdose pawh a awl a, hman hlauhawm tak a ni a. China-ah phei chuan Herion ngawlvei enkawlna aiin Fentanyl enkawlna hmun a tam zawk a ni." tiin END lam chuan an sawi bawk.

Dr. Chawnglungmuana, Director, SHALOM chuan Mizoram-ah fentanyl a lo luh a hriat loh thu a sawi a. "He damdawi hlauhawm tak hi kum 2 chhung chu kan thlir bing tawh a, kan centre rawn tlawhtute leh kan enkawllaite atangin kan chik bawk a, hei bakah kan thlithlai reng bawk a, keini lam atang chuan kan hre lo. Tunlai hian No 4 tih ching thenkhat hian 'Benzodiazepines' (eg, alprazolam, diazepam etc) te nen an chawlhpawlh thin a, hei vang hian an ruihin an nungchang a danglam zual a ni," tiin a sawi bawk. 

Engnge fentanyl chu:

Drug Enforcement Administration (DEA) in a tarlan danin nachhawkna opium siamchawp (synthetic opioid drug)  a ni a, morphine aiin a let 100 in a chak a, heroin aiin a let 50 velin a chak zawk bawk a. A hmangsual thinte chuan an hnim, zu emaw an dawlh thin a. No 4 tih chak nan an pawlh thin bawk a, overdose an awm phah vak thin a ni.