Fiamthu a thiam em avanga Zoram mipuiin kan hmelhriat, Lalngaihsaka chu October 13, 2023 (Zirtawpni) tlai khan a boral. Kum 44 mi Ngaihsaka hi hun eng emaw chen chu Care Hospital-ah enkawl a ni a, a nunna erawh chhan theih a ni ta lo - nimin khan vui liam a ni. Ngaihsaka hi a nupui nen Salem Veng-ah in luahin an khawsa a, a ruang erawh a pa Seingama, Mualpui Veng, Section II inah lak a ni. 

Ngaihsaka hian LPS Comedian Search atangin hming a rawn chher a, mipui lawm hlawh tak a ni. Fiamthu a thiam bakah fiam a dawl a, hei hi mite ngainat a hlawh chhan pakhat a ni. LPS Comedian Search-ah hming a chher hnuin Zonet buatsaih Fiamthu Fest-ah a tel leh a, pakhatna a ni nghe nghe.  

Amah hrechiangtu LPS Comedian Search chief organiser Mapuia Hauhnar chuan, "Ngaihsaka danglamna chu e, a fiamthu hi mipuiin an lawm a, mipui bakah amah hian a lawm tel nia, chu chu Ngaihsaka fiamthu min nuih nasat tir thintu chu a ni. Nuihtheih thil ka tih pui thin ten mual min han liam san chho mawlh mawlh mai hi ngaiah neih hi avan har em aw. Ngaihsak van khawpui lam i ngaihsak loha ka hriat nen maw? Lalnunsanga i kawm chak tawh em ni? Van khawpuiah i thianpa Sanga nen chuan han in battle leh ula, an hlimpui ngawt ang che u. Helam rengin kan hlimpui che u kha maw. Muangin chawl rawh aw..Ngaihsak," tiin a uina thu social media lamah a tarlang.