Mizoram Basketball Association (MBBA) senior vice president ni lai, Dr. Lalrinawma Hnamte chu Federation Internationale De Basketball (FIBA) Asia Medical Committee-ah member atan ruat a ni.

Basketball Federation of India (BFI) vice president ni lai ni bawk, Dr. Rinawma hi Mizo zinga khawvela basketball thuneitu sang ber, FIBA hnuaia Asia khawmualpui enkawltu, FIBA Asia-a hetiang chanvo luahtu hmasa ber a ni dawn a ni.

MBBA chuan an hruaitu hi an chhuang tak zet tih an sawi a, “Tha taka hna a thawh theih nan leh ram tihmingthatu a nih theih nan duhsakna sang ber kan hlan,” tiin Thawhlehnia thu an chhuahah an tar lang.

Thiamna lama doctor, Aizawl Hospital neitute zinga mi, Dr. Rinawma hi Mizoram basketball hmangaihtu a ni a, kum 2011 atang tawh khan MBBA-ah office bearer post hrang hrang a chelh tawh a, tuna senior vice president a nih hma hian term hnih a zawnin president nihna a lo chelh tawh a. Mizoram Olympic Association (MOA)-ah kum riat zet sum vawngtu a lo ni tawh bawk.

July 5-a New Delhi-a BFI hruaitu thar thlana vice president atana thlan a nih khan Mizoram basketball chanchina India ram pum pawla hruaitu nihna chelh hmasa ber a ni bawk.