FIFA World Cup 2022, Qatar a neih tur chu tla 6 chiahin a dang tawh a, khawvel hmun hrang hrang atangin khel tur ram 29 te a hriatchian tawh bawk. Khel tur ram dang 3 pawh hun reilo teah a hriat thuai dawn. Kumin World Cup khel tur star player zingah hian kum lama upa ve tawh, 2026 lama kan hmuh tawh lo tur mi 10 an awm a, kan han tarlang dawn a ni. 
    Football game mi bik pahnih, khawvel-ah anni anga ropui hi an piang leh a ngem tih hial ngam khawpa football khawvel awp hneh Lionel Messi leh Cristiano Ronaldo te chuan an career-a tum 5 nan kumin World Cup hi an khelh dawn a, an World Cup khelh hnuhnung ber tur a ni dawn bawk. Qatar FIFA World Cup, 2022 hi anni pahnih tan hun tawp a nih rualin anni pahnih bakah hian player lar kum upa ve tawh kum 4 hnu World Cup leha an hmel kan hmuh tawh loh tur uiawm deuh deuh te pawh an awm a ni.  
    World Cup khelh tawpna tur player 10 te chu tute nge an nih le:

1) Cristiano Ronaldo
    FIFA World Cup khel turin Portugal hian kawng harsa tak an paltlang a, European play-off final, March ni 29-a North Macedonia an hneh tum khan an tel thei tih a chiang chiah. Ronaldo hi tunah kum 37 a ni tawh a, a kum ngaihtuahin World Cup leh pek kum 4 hnuah chuan kum 41 a ni tawh dawn a, a khelh a rinawm tawh loh. Ballon d'Or tum 5 dawng tawh Ronaldo hi a kum ngaihtuaha zuam ngawt chi chu a ni rih lo.

2) Lionel Messi
    Little magician an tih mai Messi hian nikum khan Copa America-ah a ram Argentina a champion pui a, kumin Qatar 2022 FIFA World Cup hi atan chuan football khawvel-a ram tana trophy a chawi theih hnuhnung ber a nih tawh hmel. Ballon d’Or tum 7 dawng tawh Messi hi 2014 khan Argentina ram innghahna pawimawh ni tan tawh mah se World Cup trophy ala chawi lo. FC Barcelona player hlui kum 34 mi hian, World Cup leh pek chu a khel peih tawh kherin a rinawm loh.

3) Luka Modric
    Kum 2018 World Cup-a a ram a chetthat pui em avangin Luka Modric hian 2018 khan Ballon d’Or chawimawina a dawng. Khami tum khan a ram Croatia chu World Cup final a luhpui a ni. Kum 2007 hnu Messi-Ronaldo te era a Ballon d’Or dawng thei awmchhun Luka Modric hi tunah kum 36 a ni ve tawh a, World Cup leh chuan kum 40 lai a nih ve tawh dawn vangin a khel thei tawhin a rinawm loh. A upa viau tawh nain mual chhungah chuan a tuan a la fum lo hle tih hriat nan Champions League 2022-a Real Madrid-in PSG an thehchhuah tum khan a chetha hle a ni. 

4) Robert Lewandowski
    Bayern Munich striker pawh hi 2026 World Cup-ah meuh chuan kum 37 a ni ve tawh dawn a, a hriselna ngaipawimawh a, Cristiano Ronaldo hnung zuiaa uluk taka invawng leh taima taka a khel chho a nih loh chuan a hmel hmuh tur a awm tawh lovang. Kum 30 a chuang tawh chungin, tunah rih chuan  goal hmaah Lewandowski-a aia hlauhawm an awm bik lo. Poland international hi a vanduai hle a nih loh chuan Qatar lamah pawh hian goal thun ngei tura beisei a ni. 

5) Karim Benzema
    French forward hian 2018 World Cup kha a khel lova, mahse kuminah zet chuan a that vanglai tak a tawng chho mek thung. World Cup-ah pawh hian Les Bleus team tan a pawimawh hle tura ngaih a ni. Benzema hi kum 34 mi a ni tawh chungin Champions League knockout round-ah PSG laka hat-trick siam thei a ni a, a nep lo tih a hriat. 

6) Luis Suarez
    Suarez pawh hi kumni hi world cup a khel tum 4-na tur a ni ve tawh a, a hun tawp a nih ve tawh ngei a rinawm. Barcelona striker hlui hi khawvel player ropui zing a mi a ni. Player thahnemngai ve thei tak Suarez-a hi Uruguay tana goal khung hnem ber niin goal 55 a nei mek. Kum 35 mi Suarez hian kum hnih khat bak a khelh theih a rinawm tawh loh.  

7) Manuel Neuer
    2022 World Cup hian goalkeeper ropui Neuer hian Germany-a ho dawn a, mipui mitfukna tur a ni. Neuer hi 2014 world cup champion team zingah khan a tel ve tawh a, World Cup leh hi chuan kum 40 alo ni ve tawh dawn a, a ballboot a khai hman tawh ngeiin a rinawm. 

8) Sergio Ramos
    Spanish defender hi a rorum leh thiam vangin hriat a hlawh hle a, Ramos-a hi tunah kum 36 mi a ni ve tawh a, World Cup zawh hi chuan international football lam chu a chawlhsan tawh maiin a rinawm. 

9) Hugo Lloris
    Lloris hi France tan 2008 atang khan inlan tan tawhin tunah kum 35 mi a ni ve tawh. Hugo hi ram tan tournament lian thamah a inlan nual tawh a, chung zingah chuan Nations Leagues tum 2, Euros vawi 3 leh World Cup vawi 3. France ram tana khel tam ber record chelh mektu niiin ram tum 108 a inlan tawh. 

10) Sergio Busquets
    Spanish midfielder hi an ram aiaawha khel tam ber pathumna niin tunah hian mid-field lama an rinrawl ber a la ni thei. FC Barcelona legend hian world cup leh Euro trophy a chawi ve ve tawh. Kumin kum tawp lama World Cup tan a nih meuh chuan kum 34 mi alo ni ve tawh dawn a, Spain tana tournament lian a hmachhawn tawpna tur pawh a ni tawh maithei.