Hun harsa khawvel-in kan hmachhawn mek laiin international football tan chuan, kumin hi kum tha a tih loh theih loh. Nikum lama khelh theih loh Euro 2020, 2021 Copa America leh Gold Cup te khelh a ni.

Heng tournament pawimawh tak tak te hian FIFA World Ranking lama an dinhmun pawh a sawi danglam a, tun hnai khan FIFA chuan ram ranking thar siam hi an tlangzarh a ni. Italy, England, Argentina, Brazil leh Denmark ten tun nipui hun hmang thain dinhmun sang zawk an luah theih phah a. Football powerhouse tia chhal ngam Germany, the Netherlands leh Uruguay te chu top 10 lamah an lang phak ta lo thung. 

#1 Belgium | Points: 1832

Trophy lian tham an chawi lo chungin Belgian Red Devils hian an dinhmun ngai luahin hmun chungnung ber an luah. Roberto Martinez-a ho hian competition lamah ropui takin inlan thin lo mahse, team tha an nih an lantir thin a, tun thla phei hi chuan 2022 FIFA World Cup Qualifier game thum an khelhah an la chak vek a ni. 

#2 Brazil | Points: 1811
    2021 Copa America final-ah, Argentina lakah tlawm mah se pahnihna luah tur hian Brazil hi an tha tawk tih a chiang. International an khelh kual naah an che chhe lo mai bakah FIFA World Cup Qualifier an khelhah an che tha hle a ni. Tun hnaia Argentina nena an inhmachhawnna game khel tluan lo mahse, Chile leh Peru te an lo hneh tawh tho a, tin Selecao hian World Cup Qualifier game riat zet chak zawn tawhin 2022 FIFA World Cup champion rinkai an ni phak.

#3 England | Points: 1755
    Selna tam viau thin mahse Gareth Southgate hian Three Lions te chakna laimu hi a man fuh riau a, Euro 2020 champion pui zo lo mahse an hnualsuat phal lo. England hian FIFA World Cup Qualify an khelhah si li faiin Hungary leh Andorra an sawp a, Poland an draw chungin point 2.61 hmuh belhin pathumnaah an inhlan kai phah a ni. September 2012 hnua England-in top 3 an kai lehna hmasa bera ni bawk. Kum naupang lam huikhawmtu Southgate leh a naute hi 2022 FIFA World Cup, Qatar-a team hmuhnawm ber tur pakhat an ni.

#4 France | Points: 1754
    France hian tun hnaiah point 7 lai an hloh vangin an dinhmun ngai an luah phak lo. FIFA World Cup Qualifier-ah tum hnih draw-in vawi khat an chak thei hram. Player nei tha France hian Bosnia and Herzegovina leh Ukraine te an draw a, Finalnd 2-0 a hneh bawkin World Cup Qualifier, Group D  hmahruaitu chu an la ni thei tho.

#5 Italy | Points: 1735
    Italy hi game 37 chhung zet hneh loh tawng lovin an kal tluang a, mahse September thla hi chu an tan thla duhawm tak a ni hran lo. Azzurri te hian August thla atang khan point 9 zet an hloh chungin FIFA Rankings table-ah pangana an la niphak tho. 
Euro champion Italy hian Bulgaria leh Switzerland te an draw hnuah Lithuania si nga faiin an sawp thung a, tunah hian FIFA World Cup Qualifier,  Group C-ah hmahruaitu an ni mek.

#6 Argentina | Points: 1725
#7 Portugal | Points: 1675
#8 Spain | Points: 1673
#9 Mexico | Points: 1666
#10 Denmark | Points: 1658 

Note: FIFA ranking thar berah India chu #107 an ni.