Zaithiam Andrew Laltlankima chu film-ah kn hmu leh dawn a, One Vision Gospel Media te film siam tharah a inlan. One Vision Gospel Media film thar tur hi 'Million Dollar Boy' tih a ni a, a taka thil thleng behchhana siam a ni. An director hi Lalnunsiama (SVP) a ni a, a kutchhuak hmuh a chakawm tawh hle. Shooting leh editing hi an zo thawkhat tawh a, mahse eng emaw belh ngai tlem ala awm avangin Kolasib lamah an shoot leh mek. A tam zawk an zawh tawh avangin tlangzarh mai theih turin an peih har a rinawm tawh lo. 

An scriptwriter hi David Lalrinsanga a ni a, a changtu zingah hian Andrew Laltlankima bakah, film lama kan lo hmuh tawh thinte pawh an awm. Hmel thar hmuh tur an awm nual dawn bakah, a genre pawh kan la hmuh tam loh a nih a beisei awm. 

Kolasib tlangval Andrew Laltlankima hi mipuiten kan hmelhriatna chu music industry a ni a, a lar hnuah film industry luhchilhin a tifuh hle. Mizo film hmuhnawm leh sum lalut tam berte zinga mi 'Nunna Thar' film-ah khan hnehsawh takin a inlan a, a talent that zia hmuh hmaih chi rual a ni lo. Leitlang Pictures film (series) 'Mimi' ah a chang leh bawk a, lemchan khawvelah kan hmu chho deuh mawlh mawlh dawn a ni.