Lersia Play-in cyber crime police station-a FIR an theh luh bawhzuiin, Mizoram Cyber Crime Police-te chuan nimin June 11, 2024 (Thawhlehni) khan movie leak-out chungchangah mi pahnih an man. Movie leak-out kaihhnawihah vek hian hmeichhe pakhat, Lawngtlai khua chu ama Lersia Play account hmanga movie screen record ni ngeia finfiah a nih hnuah legal notice pek niin, Rs. 3,00,000/- chawi tura tih a ni.

Lersia Play hian an platform-a movie pakhat, account pakhat hmanga lei sa chu lo zuartu an awm avangin May 7, 2024 khan First Information Report (FIR) an theh lut. Mizoram Cyber Crime Police-te hian FIR an dawn bawhzui hian movie leak-out chungchang hi an chhui zui a, nimin khan Champhai atangin movie leak-out-a inhnamhnawih leh a mawhphurtu nia hriat; hmeichhe pakhat leh midang pakhat an man a ni. Cyber crime police-in an mante hi vawiin June 12, 2024 (Nilaini) hian Aizawl-ah an phur thla a ni. 

Movie pakhat, Telegram group hrang hranga pirated copy thawn darh avangin hmeichhe pakhat, Lawngtlai khua chu Legal Notice pek a ni bawk. Pirated copy screen record-ah hian a account neitu hming chiang taka lang chu chhui a nih hnuah a neitu hi hriat chhuah a ni a, a account neitu hian ama screen record a nih loh thu leh a ?hiante a account password a share ve thu a sawi. A thiante hi zawh chhuah an nih hnuah an screen record a nih loh thu an sawi vek avangin a account neitu hi mawhphurtuah ngaih a ni ta a ni. 

Mizo film awlsam zawka en theih tura OTT platform buatsaihtu, Lersia Play hian an application-a movie-te hi phalna nei loa lo lak chhawn emaw zawrh leh thawn darh pawh ti lo turin mipuite an chah nawn leh a ni. Lersia lam hotute chuan movie leia username leh password in-share hian a account neitute hi a mawhphurtu leh an talbuai zawk an nih thin thu an sawi a, account in-share a him loh thu an sawi bawk.

\\\\