Fimkhur a ngai

Admin - Jan 09, 2022

Hri vanga mi an thih tam tawh zia te, hri kai inenkawlna senso hautak zia bakah khawtlang leh chhungkua a tihbuai zia te hre rengin fimkhur taka kan khawsak zel a pawi-mawh hle.

Khawvelin a buaipui mek Covid-19 chuan reh lam a pan dawn hnai nia a lan laiin tunhnai atangin hri kai an pung chho nasa hle a. Ram tam takin inkhuahkhirhna an kalpui chho tan leh mek a, India ram ngeiah pawh hri kai an pung chakin state tam takin zan curfew mai bakah hri laka himna tur inkhuahkhirhna chi hrang hrang an siam chho leh mek a ni.

Mizoramah ngei pawh nikum kumtawp lama hri kai an ziaawm hnuah tunhnai atangin hri kai an pung chho leh ta a. Hei vang hian sawrkar pawhin inkaihhruaina (SoP) thar te ti chhuakin zan lama inkhawm pawh tihtawp lailawk a ni leh ta a ni. Zan inkhawm mai bakah inkhuahkhirhna chi hrang hrang kalpui leh a ni dawn a, hei hi hrileng darh zel tur khuahkhirhna atana ruahman a ni.

Hriattheih chinah Mizoram ah chuan Covid-19 hri thar Omicron chu hmuh a la ni lo a, mahse nasa takin hri hi a darh thar leh niin a lang. Mizoram bikah chuan heti tak maia hri a darh chhan hi hunpui Krismas leh Kumthar zalen lutuka kan hman vang ni berin a ngaih theih. Tun hnaia sawrkar report atanga a lan dan hi chuan Aizawl aiin thingtlang lamah hri hi a hluar zawk niin a lang a, hunpui kan hman nghawng a tih theih awm e.

Sawrkar chuan mipuite himnan hmaituamna vuah tha tur te, midang hnaiha awm lo tur leh kut tifai ngun tur ten zirtirna a pe chamchi a. Mahse mipui lam hian kan zawm tha tawk lo hle mai a. Hmun tam takah chuan ruaitheh, hmaituamna vuah loa kalkhawm leh zaikhawm hial nei te kan awm a. Hei hian nasa takin hri a thehdarh niin a lang a, kan fimkhur loh zar kan zo ta ni ten a ngaih theih hial mai.

Covid hi a la reh mai dawn lo niin a lang a. Chuvangin mithiam ten he hri laka kan himna tur an sawi te hi kan zawm that a pawimawh hle mai. Hri vanga mi an thih tam tawh zia te, hri kai inenkawlna senso hautak zia bakah khawtlang leh chhungkua a tihbuai zia te hre rengin fimkhur taka kan khawsak zel a pawimawh hle.

Share now