Tunhma atang tawhin khawvelah inbumna chi hrang hrang a awm tawh thin a. Chung zingah chuan sum hmanga inbumna hi a tlanglawn ber pawl a ni awm e. Mizoramah pawh sum peipuna tha nia insawia midang bum a tam hle a, tunhnai maiah pawh hetianga inbumna hi Serchhip ah a awm leh a, a pawi hle a ni.

Serchhip a sum peipunna hlâwk nia sawi hi March,2017 vel atanga bultan nia hriat  niin a tirah chuan chawlhkar hnih chhungin 15%-a pungin a kalpui a, mahse kum khat hnu velah thla khata 15%-a pungin kalpui zui a ni a. Sum dahtute hi Serchhip khawpui chhung bakah khaw dang atanga dah pawh an awm a, sum dahtu hi mi 50 vel nia hriat a niin an sum dah tlingkhawm hi nuai 500 vel a tlin rin a ni.

Hetianga sum peipunna hlawk 'Chaihpuam' tia an sawi mai thin hi Mizoramah pawh buaipui a ni fo tawh thin a, kum 2008 khan sum cheng nuai tel fe chu tih riral a ni tawh a. Hemi tum pawh hian mi thenkhat ten mi sum pukin a pung hlawk takin an pe a, sum kha an ta ni lovin midang ta an lak lehchhawn a ni a, a tawpawh chuan puak kehin mi tam takin an sum leh pai an chan a. Chhungkaw thenkhat phei chu kut bengin an awm a, mi thenkhat an pension sum chhuahpui zawng zawng lo dah te pawh an awm a, chhungkaw tam tak tahna thlentu a ni.

Hetiang deuh chiah mai tun hnaia a awm leh ta hi a pawi hle a, a pawi ber erawh mipui kan harh thei lo hi a ni. A chhan bul ber nia lang chu hlawk kan tum lutuk vang leh kut tling lova sum lakluh kan pawisak loh vang a ni. Mi pangngai tan chuan chawlhkar 2/1 leh sum 15% a pung te hi chu a kalphung a ni lo tih a hriat reng reng a, khawi Bank mahin hetiang hian an kalpui thei lo a ni. Mahse heti chung hian hlawk kan duh a, dan dik lo a thiltih a ni tih kan hre duh lo ni berin a lang. Chuvangin kawng lehlam zawng tak phei chuan keimahni thiltihah kan talbuai a ni ber e.

Hetiang inbumna ang chi Kristian rama a awm hi a vanduai-thlak a, Kristian mi dik tak tak inti te bum theiha kan la awm zel te hi a vanduaithlak lehzual. Nakin zelah pawh hetiang inbumna hi a la awm chho zelin a rinawm a, chutiang a awm anih pawhin dan dik taka tih a ni em tih ngun taka kan chik hmasak a pawimawh hle. Tun tuma Serchhip thilthleng hi a pawi tak zet a, mahse hun lokal zel tura min bengharhtu leh kan fimkhur lehzualna tur ni hram teh se.