Khawvelin hripui a buaipui Covid 19 chu March thla tawp lam atangin Mizoramah kan hmelhriat tan ve a, a tirah chuan hlauh namen lovin kan hlau a. Veng leh khaw hrang hrangah lockdown a ni a, chhungkaw tin inkhungin mahni kawtkaia chhuah pawh kan hreh a, chhungtinte hri laka kan him theihnan kan inkhung anih kha. Mahse tunhnaiah erawh hri hlauhna hi a tlahniam ta hle mai a, mipui zingah pawh fimkhur ngai tih lohna a lian ta hle. Hei hian thil pawi zawk min thlen thei a ni tih hriain fimkhur taka kan nun chhoh zel a pawimawh hle.

Covid hri kai hi March thla ah 1 kan nei a, kan chawlh deuh vang vang hnuah a indawtin kan nei chho malh malh a. A bikin August leh September thla chu a vanglai a ni. Sawrkar thuneitu lam an lu a hai tlang a, health department thawktute an rimin an hah hle a, dan leh thupek kengkawhtu ten chhun leh zan sawi lovin hna an thawk a. Tualchhung lamah lah nise Local Task Force lamin theihtawp an chhuah bawk a. Veng hrang hrangah hri kai hmuh an nih avangin LTF te hmalakna in kan in kharkhip 'lockdown' chhawk zut mai anih kha. Sawiselna leh mi tam takah harsatna thlen mah se, hri darh zel tur venna kawnga hmalakna tha leh tangkai ber anih avangin ti lo thei lo dinhmunah kan ding hial a ni.

Hri kai an pun avangin mi tam takin sawrkar an dem a, mi tam takin Village Council/Local Council inthlan buatsaih anih avanga hri hi darhah an ngai bawk a, hetih karah hian sawrkar tan pawh hmalak a harsa hle ang tih a rin theih. Mi thenkhat ten hri avangin sawrkar sawisel mah se, sawrkar hian theihtawp a chhuah a, sawrkar hmalakna leh thahnemngaihna hi mipui lam hian kan um tawk lo zawk niin a lang. Mi thahnemngai thenkhat ten sawisel bawrh bawrh thin mah se, India rama hri vei tlem pawl kan la ni te, Pathian khawngaihna a zara Covid 19 vanga thi la awm lo state kan ni te hi inchhuanna tham a tling a. Mipuite hian sawrkarin inkaihhruaina dan a siam te hi kan zawm tha em tih kan inenlet fo a pawimawh.

Covid 19 hri kai tam leh tam loh, a darh leh darh loh chungchangah chuan Aizawl khawpui hi Mizoram darthlalang a ni lo thei lo a ni. Tun hnaiah hri kai hmuhchhuah an tlem ta hle a, tun ni 2/3 chhung phei chuan ZMC a test-naah hri vei hmuhchhuah miah loh ni te a awm a, nimin maiah pawh tualchhunga hmuhchhuah (ZMC atangin) chu 3 chauh an ni a. Heng hri kai/vei hmuhchhuah te hi inkhunghrang mek leh positive contact atanga kai niin an lang a, midang hi state dang atanga lo lut te an ni. Mizorama hri vei number pun tam chhan hi chu force te an ni a, tunhnaia positive hmuhchhuah tam ber pawh force mi te an ni.

Hetia han ngaih mai chuan kan hnung lawka sawrkarin AMC huam chhunga inkharkhip a puan avang leh inkharkhip chhunga sample a tam thei ang ber an laa an test leh result kan hriat zung zung avang khan vantlanga inkaidarh tur (community transmission chain) chu kan chhu chat niin a ngaih theih. Hei hian mipui ah fimkhurlohna a thlen niin a lang a, thil pawi tak a ni. Europe ramah te pawh hripui hi reh thawkhata an hriat avangin mipui an fimkhur lova, chuvangin tunhnaia nasa takin a pung leh a, hetiang hi Mizoramah pawh thleng leh thei a ni. Tun dinhmunah chuan a hnukpui chu kan chhu chat niin a lang a, fimkhur tak leh sawrkar inkaihhruaina zawm chunga kan kal zel chuan hri hi kan hneh ngai a beiseiawm a. Chuti ni lova fimkhurna kan tlakchham erawh chuan nasa takin kan tuar thei a ni tih hriain fimkhur takin hri hi do zel ang u.